16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
ԵՄ-ի դրամաշնորհները տեղ չեն հասնում. 2018-ի համար նախատեսված 36 միլիոն եվրոն չի հատկացվել
Տնտեսություն
09.11.2018 | 19:09
Եվրոմիությունը 2018 թվականի ընթացքում Հայաստանին պետք է 36 մլն դրամ դրամաշնորհ տրամադրեր: Այս մասին 2018 թվականի մայիսի 31-ին Ազգային ժողովում հայտարարել էր Արտաքին գործերի փոխնախարար Արմեն Պապիկյանը: Ըստ ԱԳ փոխնախարարի՝ այդ դրամաշնորհը պետք է ուղղվի մարդկանց իրավունքերի բարելավմանը, տրանսպորտային ոլորտին և բյուջետային վարկերի կառավարմանը:
2018 թվականը վերջանում է, բայց այդ 36 մլն եվրոն այդպես էլ տեղ չի հասել: Այս մասին Factor.am-ի հարցին ի պատասխան ասաց տնտեսական զարգացման և ներդրումների փոխնախարար Մանե Ադամյանը, երբ հետաքրքվեցին, թե ինչ փուլում է դրամաշնորհի տրամադրումը: «Որպեսզի Ձեր նշած գումարը փոխանցվի պետք է գործողությունների փաստաթղթերի հիման վրա ձևավորվեն ֆինանսական համաձայնագրեր, որպեսզի փոխանցվեն այդ գումարները»,- ասաց նա:
Այս 36 մլն եվրոյից զատ պարզվում է, որ ԵՄ-ն Հայաստանին չի փոխանցել նաև 2017 թվականին տրվելիք դրամաշնորհը, որը կազմում է մոտ 38 մլն եվրո:
«2017 թվականի տարեկան գործողությունների պլանով ԵՄ-ն ՀՀ-ին պետք է տրամադրեր 34,5 մլն եվրո դրամաշնորհ և 3 մլն 125 հազար եվրոյով էլ պետք է համաֆինանսավորեր Թումոն: Այս գումարով նախատեսվում է Թումոյին կից լաբորատորիա ստեղծել, որը հասանելի է լինելու բոլորին: Այս գումարը դեռ չի եկել, ու որպեսզի գա, մենք, բացի գործողություների փաստաթղթերը, պետք է մշակենք ֆինանսական համաձայնագրեր, որպեսզի այդ գումարները հատկացնեն»,- պարզաբանեց փոխնախարարը:
Factor.am-ի հարցին՝ ինչու՞ է հայկական կողմը թերացել և համապատասխան փաստաթղթերի մշակումը ուշացրել, որ տարին ավարտվում է, իսկ նշյալ գումարները չկան, Մանե Ադամյանն ասաց. «Մենք բնավ չենք ուշացրել, 2017 թվականի փաստաթղթերը ժառանգել ենք հետևյալ տեսքով՝ եղել են գործողությունների փաստաթղթեր և ֆինանսական համաձայնագրերի նախագծեր, որոնք ստորագրված չեն եղել։ Հիմա դրանք անցնում են համապատասխան ընթացակարգերով, որպեսզի ստորագրվեն ։ Բացի այդ արդեն հաստատել ենք 2018 թվականի գործողությունների ծրագիրը և ամփոփում ենք ֆինասական համաձայնագրերը, ներկայացրել ենք նաև առաջարկների փաթեթ 2019 թվականի ծրագրի համար»:
Նա չբացառեց, որ մինչև տարեվերջ գումարի մի մասը կփոխանցվի: «2017 թվականի համար նախատեսվածը հնարավոր է, որ այս տարվա վերջին հասցնեն, իսկ 2018 թվականինը՝ մյուս տարվա սկզբին ակնկալում ենք: Այս գումարը չի մտնելու պետական բյուջե, այլ մտնելու է կոնկրետ ոլորտներ»,- ասաց փոխնախարարը:
Ի դեպ, ստեղծված իրավիճակի համատեքստում ուշագրավ է այն, որ 2018 թվականի հունիսի 1-ից Հայաստան-ԵՄ համաձայնագիրը 80 տոկսով մտել է ուժի մեջ:
Հայկ Վարդանյան
