07.03.2026 | 12:34
Ֆինն Գերագուսյանը գոլ է խփել Հայաստանի հավաքական հրավիրվելուց հետո․ ՏԵՍԱՆՅՈՒԹ
Ռուսաստանի նավթավերամշակման գործարաններ մղվող նավթի ծավալը նվազել է՝ հասնելով 15 տարվա ամենացածր մակարդակին
Քաղաքականություն
20.01.2026 | 13:19
2025 թվականին Ռուսաստանի նավթավերամշակման գործարաններ նավթի խողովակաշարային մատակարարումների ծավալները նվազել են՝ հասնելով 2010 թվականից ի վեր ամենացածր մակարդակին։ Վերլուծաբանները դա բացատրում են «արտաքին գործոնների ազդեցությունից» հետո չպլանավորված անջատումներով և նորոգումներով, գրում է The Insider-ը։
Ընդհանուր առմամբ, ըստ «Կոմերսանտ»-ի, անցյալ տարի նավթավերամշակման գործարաններ նավթի մատակարարումները գնահատվել են 228,34 միլիոն տոննա։ Տարեկան մատակարարումները նվազել են 1,6%-ով, սակայն սա վերջին 15 տարիների ընթացքում ամենացածր մակարդակն է։
Այս ֆոնին նավթավերամշակման ընդհանուր ծավալը նույնպես նվազել է 1,7%-ով՝ 2024 թվականի համեմատ։
Փորձագետները մատակարարումների անկումը բացատրում են «նավթավերամշակման գործարաններում չծրագրված նորոգումներով», որը հաջորդել է «արտաքին ազդեցություններին»։ Նման միջադեպերի ամենամեծ թիվը գրանցվել է տարվա երկրորդ կեսին. օգոստոսից մինչև նոյեմբեր նավթավերամշակման գործարանները ստացել են, ընդհանուր առմամբ, 85,9 միլիոն տոննա նավթ՝ 2024 թվականի նույն ժամանակահատվածի 90 միլիոնի համեմատ։
Ամենաշատը տուժել է «Ռոսնեֆտ»-ը, որի վերամշակման գործարանների բեռնվածության մակարդակը նվազել է գրեթե 8%-ով։ Օրինակ՝ Ռյազանի նավթավերամշակման գործարանին նավթի մատակարարումները նվազել են 34%-ով։
Նավթավերամշակման գործարանները հաճախակի թիրախ են դառնում ուկրաինական անօդաչու թռչող սարքերի հարձակումների համար։ 2025 թվականի ամռանից ի վեր անօդաչու սարքերը DeepStrike ռազմավարության շրջանակում պարբերաբար հարվածներ են հասցնում սահմանից 500 կմ կամ ավելի հեռավորության վրա գտնվող ռուսական նավթավերամշակման գործարաններին՝ թիրախավորելով առաջնային վերամշակման առանցքային օբյեկտները։
Թարգմանությունը՝ Էմմա Չոբանյանի
