Այդ հոգևորականները սեռական կապի մեջ են մտել իրար հետ, բիզնեսով զբաղվել․ դրանց հավաքել, եկեղեցի՞ է մաքրում․ Ստեփան Դանիելյան․ՏԵՍԱՆՅՈՒԹ

«Մայր Հայաստան» կուսակցության վարչության անդամ, քաղաքագետ Ստեփան Դանիելյանը Factor TV-ի եթերում անդրադարձել է ռուս քարոզիչ Վլադիմիր Սոլովյովի՝ Հայաստանում «հատուկ ռազմական գործողություն» սկսելու հնարավորության մասին հայտարարությանը՝ այն որակելով «ժամանակակից և առաջադեմ»՝ համաշխարհային գործընթացների համատեքստում։

Նրա խոսքով՝ աշխարհը վերադառնում է ազդեցության գոտիների քաղաքականությանը, և Հայաստանը, չդատապարտելով այլ երկրների կողմից ինքնիշխանության խախտումները, կորցնում է իր դեմ ուղղված նման սպառնալիքները քննադատելու բարոյական իրավունքը։ «Եթե դու ռազմաբազան չես հանում, սահմանապահներին չես հանում, ապա դու ընդունում ես, որ դու ազդեցության գոտի ես»,- նշել է Դանիելյանը՝ կարծիք հայտնելով, որ Հայաստանը դե յուրե գտնվում է Ռուսաստանի ազդեցության գոտում։

Քաղաքագետը Հայաստանի իշխանությունների արտաքին քաղաքականությունը բնութագրել է որպես «մարմնավաճառի քաղաքականություն»՝ պնդելով, որ երկիրը զիջում է իր ինքնիշխանությունը տարբեր ուժերի։ «Հայաստանի տարածքի մի մասը, որ 99 տարով սուվերեն իրավունքը հանձնում և ստորագրում է, որ Ադրբեջանը և Թուրքիան չգան գրավեն, ինքը տալիս է այլ երկրի, այսինքն քո ինքնիշխանությունը դու հանձնում ես։

Մի մասով Ռուսաստանին, մի մասով Ամերիկային», – ասել է նա։
Խոսելով Հայ առաքելական եկեղեցու շուրջ ստեղծված ճգնաժամի մասին՝ Դանիելյանը նշել է, որ իշխանության արշավի իրական պատճառը ոչ թե եկեղեցու բարեփոխումն է, այլ այն, որ Կաթողիկոսը Շվեյցարիայում բարձրաձայնել է գերիների և արցախահայության վերադարձի հարցերը։ Նրա խոսքով, իշխանությունը «փորձում է գրավել» ազգային վերջին ինստիտուտներից մեկը, քանի որ եկեղեցին բարձրացնում է ազգային խնդիրներ։

Դանիելյանը պնդում է, որ իշխանության մեղադրանքները Կաթողիկոսի հասցեին «պատրվակներ են», որոնք անընդհատ փոփոխվում են։ Միևնույն ժամանակ, նա վստահեցնում է, որ եկեղեցու ներսում սկսվել է «մաքրման գործընթաց», և այն 10 եպիսկոպոսները, որոնք դեմ են Կաթողիկոսին, «պետք է եկեղեցուց մաքրվեն»։

Անդրադառնալով 2026 թվականի ընտրություններին՝ «Մայր Հայաստան» կուսակցության անդամը հայտնել է, որ չի քննարկվել Ռոբերտ Քոչարյանի հետ դաշինքով հանդես գալու հարցը։ Նա անձամբ գտնում է, որ ընդդիմությունը պետք է ընտրություններին մասնակցի «երկու կամ երեք միասնական շարասյուներով», ինչը, նրա կարծիքով, «ամենաարդյունավետ տարբերակը կլինի»։

Հարցազրույցն ամբողջությամբ՝ տեսանյութում։
Ռոբերտ Անանյան