Միայն իմ բարոյականությունը կարող է ինձ կանգնեցնել. Թրամփը հայտարարել է՝ իրեն միջազգային իրավունք պետք չէ

ԱՄՆ նախագահ Դոնալդ Թրամփը հայտարարել է, որ լիազորությունները սահմանափակվում են միայն իր «սեփական բարոյականությամբ», այլ ոչ թե միջազգային իրավունքով։

«Կա մեկ սահմանափակում՝ իմ սեփական բարոյականությունը, իմ սեփական գիտակցությունը։ Սա միակ բանն է, որը կարող է կանգնեցնել ինձ։ Ինձ միջազգային իրավունք պետք չէ։ Ես չեմ ձգտում վնասել մարդկանց»,- ասել է Սպիտակ տան ղեկավարը The New York Times-ին տված հարցազրույցում, փոխանցում է DW-ի ռուսական ծառայությունը։

Հարցին՝ արդյո՞ք իր վարչակազմը պետք է հետևի միջազգային իրավունքին, Թրամփը պատասխանել է. «Այո»։

Ավելի ուշ նա հավելել է, որ ինքը կորոշի, թե երբ նման սահմանափակումները կկիրառվեն Միացյալ Նահանգների նկատմամբ։

«Դա կախված է նրանից, թե ինչպես եք սահմանում միջազգային իրավունքը»,- ասել է նա։

Դոնալդ Թրամփը հրաժարվել է ուղղակիորեն պատասխանել հարցին, թե իր համար ինչն է ավելի կարևոր՝ Գրենլանդիայի նկատմամբ ԱՄՆ-ի վերահսկողությունը ստանձնե՞լը, թե՞ ՆԱՏՕ-ի պահպանումը, սակայն ընդունել է, որ «կարող է լինել ընտրություն»։ Նա հստակեցրել է, որ դաշինքն առանց Միացյալ Նահանգների, «ըստ էության անօգուտ է»։

«Կարծում եմ՝ մենք միշտ լավ հարաբերություններ կունենանք Եվրոպայի հետ, բայց ես ուզում եմ, որ նրանք խելքի գան։ Ես եմ նրանց դրդել ավելի շատ ծախսել ՆԱՏՕ-ի վրա և ավելացնել իրենց ՀՆԱ-ն»,- հայտարարել է Թրամփը։

Նա նաև մերժել է պնդումը, որ Վենեսուելայի նախաագահ Նիկոլաս Մադուրոյին գերի վերցնելու նպատակով Կարակասում ԱՄՆ-ի կողմից իրականացված ռազմական գործողությունը նախադեպ է ստեղծել, որին Չինաստանը կարող է հետևել Թայվանի նկատմամբ իր պահանջներում։

«Նրանից է (Չինաստանի նախագահ Սի Ցզինպինից) կախված, թե ինչ կանի։ Բայց ես նրան ասել եմ, որ շատ դժգոհ կլինեմ, եթե նման բան անի։ Եվ չեմ կարծում, որ նա կանի։ Հուսով եմ՝ չի անի»,- հայտարարել է Թրամփը։

Թարգմանությունը՝ Էմմա Չոբանյանի