10.01.2026 | 14:18
ՄԱԿ անվտանգության խորհուրդն Ուկրաինայի հարցով արտահերթ նիստ կգումարի
Թրամփը Իրանին սպառնացել է «դժոխքով»՝ ցուցարարներին սպանելու դեպքում, միաժամանակ, հրաժարվել հանդիպել շահի որդու հետ
Քաղաքականություն
09.01.2026 | 13:00
ԱՄՆ նախագահ Դոնալդ Թրամփը կրկին սպառնացել է Իրանին պատասխան միջոցներով, եթե Իսլամական Հանրապետությունը ճնշի վերջին երկու շաբաթներին փողոց դուրս եկած ցուցարարներին։
«Ես նրանց տեղեկացրել եմ, որ եթե սկսեն մարդկանց սպանել, ինչը նրանք սովորաբար անում են իրենց անկարգությունների ժամանակ, մենք նրանց շատ ուժեղ հարվածելու ենք»,- ասել է Թրամփը ռադիոհաղորդավար Հյու Հյուիթի հետ զրույցում, գրում է The Times of Israel-ը։
Դիտարկմանը, որ բողոքի ցույցերի ժամանակ տասնյակ մարդիկ են զոհվել, Թրամփը պատասխանում է, որ այդ մահերի մի մասը պայմանավորված է հրմշտոցներով և պարտադիր չէ, որ իրավապահ մարմինների կողմից լինի։
«Ես վստահ չեմ, որ կարող եմ որևէ մեկին պատասխանատու համարել դրա համար, բայց նրանց շատ խիստ ասվել է, նույնիսկ ավելի խիստ, քան ես հիմա ձեզ հետ եմ խոսում, որ եթե նրանք դա անեն, ապա ստիպված կլինեն դժոխքով վճարել»,- ասել է Թրամփը։
Իրանի տապալված շահի որդու՝ Ռեզա Փահլավիի հետ հանդիպելու վերաբերյալ հարցին ԱՄՆ նախագահը պատասխանել է, որ այս պահին դա չի անի։
«Ես նրան հետևել եմ, և նա թվում է հաճելի մարդ, բայց վստահ չեմ, որ այս պահին դա անելը նպատակահարմար կլինի։ Կարծում եմ, որ մենք պետք է թույլ տանք բոլորին դուրս գալ այնտեղ, և կտեսնենք, թե ով կհայտնվի»,- ասել է նա։
Ավելի վաղ Թրամփը հայտարարել էր, որ եթե Իրանը կրակ բացի և դաժանորեն սպանի խաղաղ ցուցարարներին, Միացյալ Նահանգները նրանց օգնության կհասնի։
Թարգմանությունը՝ Էմմա Չոբանյանի
