10.10.2026 | 21:37
Կանանց Հայաստանի հավաքականը ոչ-ոքի խաղաց Ինդոնեզիայի հետ
Մոսկվան ու Փարիզը ֆրանսիացի քաղաքագետ Վիտանիեին փոխանակել են բասկետբոլիստ Կասատկինի հետ
Քաղաքականություն
08.01.2026 | 21:43
Ռուս բասկետբոլիստ Դանիիլ Կասատկինը փոխանակվել է ֆրանսիացի քաղաքագետ Լորան Վինատիեի հետ, որը Ռուսաստանում դատապարտվել էր և Արդարադատության նախարարության կողմից որակվել որպես «օտարերկրյա գործակալ»։ ՌԲԿ-ի հաղորդմամբ՝ այս մասին հայտնել է ՌԴ Անվտանգության դաշնային ծառայությունը (ԱԴԾ)։
«Ֆրանսիական դատարանը հաստատել է Կասատկինի արտահանձնումը Միացյալ Նահանգներ, սակայն վարչապետը չէր ստորագրել այն։ Իր փաստաբանների համառ աշխատանքի շնորհիվ Դանիիլ Կասատկինը երեկ երեկոյան ազատ է արձակվել բանտից։ Նրան նստեցրել են ինքնաթիռ, որն արդեն վայրէջք է կատարել Մոսկվայում»,- ավելի վաղ «ՌԻԱ Նովոստի»-ին ասել էր Կասատկինի փաստաբան Ֆրեդերիկ Բելոն։
Կասատկինը ձերբակալվել է 2025 թվականի հունիսի 21-ին Փարիզի Շառլ դը Գոլի օդանավակայանում՝ Միացյալ Նահանգների խնդրանքով, որը բասկետբոլիստին կասկածում էր հաքերային ցանցի հետ կապերի մեջ, որը 2020-2022 թվականներին ամերիկյան ընկերությունների և դաշնային գործակալությունների դեմ օգտագործել է գումար շորթող ծրագրեր: Հոկտեմբերի 29-ին Փարիզի դատարանն ամերիկյան իշխանությունների խնդրանքով հրամայել է Կասատկինին արտահանձնել Միացյալ Նահանգներին։
ԱՄՆ-ումնրան սպառնում էր մինչև 25 տարվա ազատազրկում՝ համակարգչային խարդախության մեղադրանքով: Կասատկինը հերքում է բոլոր մեղադրանքները:
2024 թվականի աշնանը ֆրանսիացի քաղաքագետ Լորան Վինատիեն դատապարտվել էր երեք տարվա ազատազրկման՝ Ռուսաստանի ռազմական գործունեության վերաբերյալ տեղեկություններ հավաքելու և որպես օտարերկրյա գործակալ իր պարտականություններից խուսափելու համար: Այս տարվա օգոստոսին ֆրանսիացին նաև դարձել է լրտեսության հետաքննության գործով անձ:
Դեկտեմբերի 19-ին ՌԴ նախագահ Վլադիմիր Պուտինի հետ ուղիղ կապի ժամանակ TF1-ի լրագրող Ժերոմ Գարոն հայտնել էր, որ իր գործընկեր Վինատիեն արդեն իսկ բանտարկված է Ռուսաստանում, և որ նոր մեղադրանք է քննարկվում։ Պուտինն ասել էր, որ չի լսել այդ մասին, բայց խոստացել էր ուսումնասիրել խնդիրը, եթե օրենքը թույլ տա։
Մի քանի օր անց ՌԴ նախագահի մամուլի քարտուղար Դմիտրի Պեսկովը հայտարարել էր Ռուսաստանի և Ֆրանսիայի միջև Վինատիեի գործի վերաբերյալ շփումների մասին։
Թարգմանությունը՝ Էմմա Չոբանյանի
