Սիրիական բանակը հրամայել է տարհանվել Հալեպի քրդական շրջանների բնակիչներին

Սիրիական կառավարական բանակը հինգշաբթի Հալեպի որոշ հատվածներում բախվել է քրդերի գլխավորած «Սիրիական դեմոկրատական ​​ուժերի» (SDF) մարտիկների հետ և հրամայել է բնակիչներին տարհանվել՝ SDF-ին մեղադրելով քրդաբնակ մեծամասնությամբ տարածքները հարձակումներ իրականացնելու համար օգտագործելու մեջ, գրում է Reuters-ը։

Սիրիական պետական ​​լրատվամիջոցների փոխանցմամբ՝ բանակը հրապարակել է յոթից ավելի քարտեզներ, որոնցում նշված են այն տարածքները, որոնք, ըստ բանակի, թիրախավորվելու են հարվածների ժամանակ։ Գործողությունների հրամանատարությունը ժամը 15:00-ից (12:00 GMT) Շեյխ Մաքսուդ և Աշրաֆիե թաղամասերում հայտարարել է պարետային ժամ։

Պետական ​​լրատվամիջոցների հաղորդմամբ՝ երեքշաբթի բռնկված մարտերի հետևանքով հազարավոր խաղաղ բնակիչներ են լքել իրենց տները, սպանվել և վիրավորվել է մի քանի մարդ։

SDF-ը հայտարարել է, որ իրենց մարտիկները Հալեպի սիրիական թաղամասի մոտակայքում ինտենսիվ բախումների մեջ են եղել Դամասկոսի հետ կապված և օժանդակ խմբավորումների հետ՝ հավելելով, որ նրանք պատճառել են ծանր կորուստներ։

Ըստ հրապարակման՝ բռնությունը և պատասխանատվության վերաբերյալ հակառակորդ կողմերի պնդումներն ընդգծում են Դամասկոսի և քրդական իշխանությունների միջև խորացող և ավելի ու ավելի մահացու դիմակայությունը, որոնք դիմադրում են կենտրոնական կառավարությանը ինտեգրվելուն։

SDF-ը Դամասկոսին մեղադրում է դաշնակից խմբավորումներին քաղաքացիական տարածքների վրա անօրինական հարձակումներով սպառնալու մեջ՝ ասելով, որ հրետակոծության մասին հրապարակային նախազգուշացումները կարող են համարվել հարկադիր տեղահանություն և պատերազմական հանցագործություններ՝ համաձայն միջազգային մարդասիրական իրավունքի։

Անցյալ տարի Դամասկոսը համաձայնության հասավ Սիրիայի դեմոկրատական ​​ուժերի (SDF) հետ՝ կոչ անելով լիակատար ինտեգրման մինչև 2025 թվականի վերջը, սակայն առաջընթացը սահմանափակ էր, և երկու կողմերն էլ մեղադրում էին միմյանց գործընթացը հետաձգելու մեջ։

Միացյալ Նահանգները փորձել է միջնորդել՝ հանդիպումներ անցկացնելով, սակայն այդ բանակցությունները նույնպես ավարտվել են առանց շոշափելի արդյունքների։

Դիվանագետները զգուշացնում են, որ SDF-ի ինտեգրման ձախողումը սիրիական բանակին վտանգում է հետագա բռնությամբ և կարող է ներգրավել Թուրքիային, որը սպառնացել է ռազմական գործողություններ սկսել քուրդ զինյալների դեմ, որոնք համարում է ահաբեկիչներ։ Թուրքիան հայտարարում է Սիրիային օգնելու պատրաստակամության մասին՝ խնդրանքի դեպքում։

Թարգմանությունը՝ Էմմա Չոբանյանի