16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Նախկին իշխանության քրեածին էլեմենտները մինչ այսօր պայքարում են, որ Արամի 23 շենքը քանդվի․ Տիգրան Հեքեքյան
Քաղաքականություն
07.11.2018 | 15:00
«Վարչապետի աշխատակազմից եկել էին ներկայացուցիչներ և համոզում էին, որ Արամի 23 շենքը երկու մետր քանդվի: Այսինքն նրանք եկել են հանցավոր համաձայնության նախկին կառավարության մնացուկների հետ, որոնք ինչ-որ կերպ մոտեցել են Փաշինյանին»,-այսօր հրավիրված քննարկման ժամանակ ասաց «Հայաստանի փոքրիկ երգիչներ» երգչախմբի ղեկավար Տիգրան Հեքեքյանը։
«Նախկին իշխանության քրեածին էլեմենտները մինչ այսօր պայքարում են, որ Արամի 23 շենքը քանդվի»,-ասաց Հեքեքյանը և հավելեց, որ որպես շենքի սեփականատեր բավարարված չեն Մեսչյանի երեկվա ելույթից այն առումով, որ որևէ ժամկետ չարծարծվեց, թե երբ կներկայացվի երկրորդ նախագիծը, երբ կներկայացվի նախարարություն, երբ կսկսեն շինարարությունը։
«Ստացվում է այսպես՝ մենք շենք չենք քանդում, ինքն իրեն կքանդվի»,- ասաց Հեքեքյանը՝ հիշեցնելով, որ սեպտեմբերից մինչև օրս երգչախմբից 15 երեխա է դուրս եկել՝ պայմանների, միջավայրի պատճառով, շատ կարևոր հրավեր են ունեցել, սակայն մերժել են։
««Հայ փոքրիկ երգիչներ» միջազգային ասոցիացիայի կառույցում գործող երգչախմբի՝ թվով 160 երեխայի աշխատանքը խաթարված է, և եթե այսպես գնա մենք հետո հնարավոր է չկարողանանք վերականգնվել»,- ասաց նա։
Քննարկման մասնակից ՀՀ Մշակույթի նախարարության աշխատակազմի պատմության և հուշարձանների պահպանության գործակալության պետ Արմեն Աբրոյանն էլ խնդրի վերաբերյալ նշեց, որ «Հին Երևանի» տարածքում բոլոր աշխատանքները կատարվում են ապօրինաբար, դրանց վերաբերյալ հայտարարություններ են արել, սակայն մինչ օրս «Հին Երևանի» տարածքում կատարվում են դարձյալ ապօրինի շինարարական աշխատանքներ։
Պաշտոնյայի խոսքով՝ հուշարձանի ամրակայումը չպետք է լինի ժամանակավոր, միայն վերևի մասով, քանի որ հիմքերի թուլացման պատճառով է հուշարձանն այսօրվա վիճակում։ Նա ասաց, որ եթե հիմքերը չամրակայվեն, որևէ միջոցառում անիմաստ է։
«Արամի 23 շենքը չի քանդվի, սակայն ինչպե՞ս պահպանել, որ չփլուզվի» քննարկմանը մասնակցող ճարտարապետ Դավիթ Նահատակյանն էլ հավելեց, որ վերջին 25 տարում մեծ սխալներով են կատարվում պատմամշակութային հուշարձանների վերականգնման աշխատանքները:
