Թրամփը պահանջել է ԱՄՆ ռազմական բյուջեն 50%-ով ավելացնել՝ հասցնելով 1,5 տրիլիոն դոլարի

ԱՄՆ-ի 2027 թվականի ռազմական բյուջեն պետք է կազմի 1,5 տրիլիոն դոլար։ ԱՄՆ նախագահ Դոնալդ Թրամփն այս մասին հայտարարել է TruthSocial սոցիալական ցանցում գրառմամբ, փոխանցում է DW-ի ռուսական ծառայությունը։

Այս գումարը զգալիորեն գերազանցում է Կոնգրեսի կողմից 2026 թվականի համար հաստատված 901 միլիարդ դոլարը (771 միլիարդ եվրո), հաղորդում է Reuters-ը։ Թրամփը նշել է, որ որոշումը կայացրել է «սենատորների, կոնգրեսականների, քարտուղարների (դեպարտամենտների ղեկավարներ) և այլ քաղաքական ներկայացուցիչների հետ երկար և դժվար բանակցություններից հետո»։

Սպիտակ տան ղեկավարը պնդել է, որ այս քայլը Վաշինգտոնին թույլ կտա ստեղծել «երազանքի բանակը» և ապահովել «անվտանգություն և պաշտպանվածություն»։ ԱՄՆ նախագահը պնդել է, որ ծախսերի ավելացումը հնարավոր կլինի «շնորհիվ մաքսատուրքերի»։ Նա նաև համոզմունք է հայտնել, որ Միացյալ Նահանգները կկարողանա շարունակել կրճատել ազգային պարտքը և դիվիդենտներ վճարել «միջին եկամուտներ» ունեցող ամերիկացիներին։

Միևնույն ժամանակ, ռազմական բյուջեի ցանկացած ավելացում կպահանջի ԱՄՆ Կոնգրեսի հաստատումը, նշում է Reuters-ը՝ նշելով, որ հանրապետականները ներկայումս նեղ մեծամասնություն են կազմում և՛ Սենատում, և՛ Ներկայացուցիչների պալատում։ ԱՄՆ-ն արդեն ավելի շատ գումար է ծախսում ռազմական կարիքների վրա, քան մյուս երկրները, հաղորդում է AFP-ն։ Ավելի վաղ Թրամփը սոցիալական ցանցերում կասկածներ էր հայտնել Վաշինգտոնի ՆԱՏՕ-ի դաշնակիցների հավատարմության վերաբերյալ։

Բացի այդ, «Դաշնային բյուջեի համար պատասխանատու կոմիտե» վերլուծական կենտրոնը պնդում է, որ Թրամփի առաջարկների իրականացման համար մինչև 2035 թվականը կպահանջվի 5 տրիլիոն դոլար (4 տրիլիոն եվրո), ինչը ԱՄՆ պետական ​​պարտքին կավելացնի 5,8 տրիլիոն դոլար (4,9 տրիլիոն եվրո): Կենտրոնը կարծում է, որ ծախսերի միայն կեսը կարող է ծածկվել գործող մաքսատուրքերով:

Ըստ Politico-ի վարկածի՝ «մեծ աճը», հավանաբար, պայմանավորված է Թրամփի մի քանի ծրագրերի բարձր արժեքով՝ սկսած «Ոսկե գմբեթ» հակաօդային պաշտպանության համակարգից մինչև «Ոսկե նավատորմ»՝ ռազմածովային ուժերի արդիականացման նախագիծը։ Սպիտակ տան տվյալներով՝ այս նավատորմերը, ինչպես սպասվում է, առաջիկա տարիներին կներառեն նոր սերնդի մարտանավեր՝ անհավանականորեն մեծածավալ սարքավորումներով։

ԱՄՆ 2026 թվականի պաշտպանական բյուջեի օրինագիծը, որը նախատեսում է ռազմական ծախսերի ռեկորդային 901 միլիարդ դոլար, Կոնգրեսի կողմից ընդունվել է 2025 թվականի դեկտեմբերի 17-ին: Փաստաթուղթը, մասնավորապես, նախատեսում է զինծառայողների աշխատավարձի 3,8%-ով բարձրացում, ռազմական տեխնիկայի գնում և ԱՄՆ-ի մրցունակության ամրապնդման միջոցառումներ՝ իր հիմնական մրցակիցների՝ Չինաստանի և Ռուսաստանի նկատմամբ:

Թարգմանությունը՝ Էմմա Չոբանյանի