Իսրայելի բանակը հայտարարել է Լիբանանում «Հըզբոլլահ»-ի և «ՀԱՄԱՍ»-ի օբյեկտներին հարվածելու մասին

Իսրայելի պաշտպանության բանակը հայտարարել է Լիբանանում «Հըզբոլլահ»-ի և «ՀԱՄԱՍ»-ի ենթակառուցվածքներին հարվածներ հասցնելու մասին, գրում է Current time-ը։

Ըստ Իսրայելի պաշտպանության բանակի՝ թիրախավորվել են մի քանի զենքի պահեստներ, վերգետնյա և ստորգետնյա ռազմական օբյեկտներ, ինչպես նաև՝ ՀԱՄԱՍ-ի զենքի արտադրության վայրերը Լիբանանի հարավում։ Այս օբյեկտները, ենթադրաբար, օգտագործվել են ռազմական ուժեր կուտակելու և իսրայելական զորքերի դեմ ահաբեկչական հարձակումներ իրականացնելու համար։

«Ահաբեկչական ենթակառուցվածքային օբյեկտները գտնվում էին քաղաքացիական տարածքներում, ինչը ևս մեկ օրինակ է այն բանի, թե ինչպես են ահաբեկչական կազմակերպությունները ցինիկաբար օգտագործում լիբանանցի խաղաղ բնակիչներին որպես կենդանի վահաններ»,- նշվում է մամուլի հաղորդագրության մեջ:  Նշվում է, որ հարվածից առաջ ձեռնարկվել են միջոցառումներ բնակչությանը նախազգուշացնելու և խաղաղ բնակիչների շրջանում վնասը նվազագույնի հասցնելու համար։

AP-ը հաղորդում է, որ Իսրայելի ռազմաօդային ուժերը հարվածել են Լիբանանի հարավային և արևելյան շրջաններին, այդ թվում՝ երկրի երրորդ խոշորագույն քաղաք Սիդոնին: Նշվում է, որ հարվածներից մեկը հողին է հավասարեցրել Սիդոնում գտնվող եռահարկ առևտրային շենքը:

Լիբանանի նախագահ Ջոզեֆ Աունը դատապարտել է հարձակումները՝ ասելով, որ դրանք հակասում են ինչպես մարտական ​​գործողություններն ապաէսկալացնելու միջազգային ջանքերին, այնպես էլ Լիբանանի ջանքերին՝ ընդլայնելու կառավարության իշխանությունը «Հըզբոլլահի» կողմից երկար ժամանակ վերահսկվող տարածքներում։

Թարգմանությունը` Էմմա Չոբանյանի