99 տարեկանում կյանքից հեռացած լեգենդար ֆուտբոլիստ և մարզիչ Նիկիտա Սիմոնյանը մահվանից երկու տարի առաջ պաշտոնապես փոխել է հայրանունը։ Այդ մասին Sport-express-ի հետ հարցազրույցում հայտնել է Նիկիտա Սիմոնյանի դուստր Վիկտորիան։
-Հայրդ պատմե՞լ է, թե ինչպես նա Մկրտիչ Պողոսովիչից դարձավ Նիկիտա Պավլովիչ։
-Դա տեղի է ունեցել բնական կերպով։ Ինչ-որ տեղ լուրեր էին շրջանառվում, թե հայրիկը իբր հրաժարվել է իր իսկական անունից, բայց դա այդպես չէ։ Պարզապես նրա անունը երկրպագուների համար դժվար էր վանկարկել։ Երբ նա խաղում էր Սուխումիում, նրանք չէին կարող վանկարկել. «Մկրտիչ, Մկրտիչ»։ Սկզբում նրան կոչում էին Միկիշկա, հետո՝ Նիկիտա։ Եվ երբ հայրիկն անձնագիր էր ստանում, ինքն է խնդրել պապիկին, որ անունը նշեն Նիկիտա։ Նա արդեն սովորել էր, որ երկրպագուների ու ընկերների շրջանում իրեն այդպես են կոչում։ Պապիկը համաձայնել էր, բայց ասել էր, որ անձնագրում հայրանունը պետք է մնա Պողոսովիչ։ Մինչև վերջերս հայրիկի բոլոր քաղաքացիական գրանցման փաստաթղթերում հայրանունը նշված էր Պողոսովիչ։
-Ամեն դեպքում, նա պաշտոնապես փոխե՞ց հայրանունը։
-Այո։ Ամբողջ կյանքում նրան կոչում էին Նիկիտա Պալիչ, երբեմն էլ՝ պարզապես Պալիչ։ Պողոսովիչ նրան ոչ ոք չէր ասում։ Եվ նա սկսեց մտածել. «Ինչպե՞ս է ստացվում, որ ես կմահանամ, և շիրիմի վրա գրված կլինի «Նիկիտա Պողոսովիչ», իսկ ինձ ամբողջ կյանքում Պալիչ են կոչել»։ Որոշեց, որ հայրը չի նեղանա իրենից, և փոխեց հայրանունը։ Դա տեղի ունեցավ շուրջ երկու տարի առաջ։
