Դոնալդ Թրամփը սպառնացել է Կուբային, Կոլումբիային և Մեքսիկային

ԱՄՆ նախագահ Դոնալդ Թրամփը սպառնացել է Կուբային, Կոլումբիային և Մեքսիկային՝ Վենեսուելայից հետո։ Պատմելով մամուլի ասուլիսում Նիկոլաս Մադուրոյի գերեվարման մանրամասները՝ Թրամփը կոշտ արտահայտություններով է հանդես եկել Լատինական Ամերիկայի այլ առաջնորդների հասցեին, գրում է DW-ն։

«Նա արտադրում է կոկաին, որը նրանք մատակարարում են ԱՄՆ։ Այդ պատճառով նա պետք է հետևի իրեն»,– ասել է նա Կոլումբիայի նախագահ Գուստավո Պետրոյի մասին։ Վերջինս ավելի վաղ դատապարտել էր ԱՄՆ ներխուժումը Վենեսուելա։

«Կարծում եմ՝ ի վերջո մենք նաև Կուբայի մասին կխոսենք։ Որովհետև Կուբան հիմա ավերված վիճակում է, չափազանց վատ վիճակում։ Եվ մենք ուզում ենք օգնել մարդկանց։ Դա շատ նման է Վենեսուելային այն առումով, որ մենք ուզում ենք օգնել Կուբայի ժողովրդին»,– շարունակել է Թրամփը։

«Եթե ես Հավանայում ապրեի և կառավարության կազմում լինեի, գոնե մի փոքր կզգուշանայի»,– հավելել է ԱՄՆ պետքարտուղար Մարկո Ռուբիոն։

Ժամեր առաջ Fox News-ին տված հարցազրույցում Թրամփը պնդել էր, որ Մեքսիկայի նախագահ Կլաուդիա Շեյնբաումը իբր զիջել է երկրի վերահսկողությունը նարկոկարտելներին․ «Նա լավ կին է, բայց Մեքսիկան ղեկավարում են նարկոկարտելները։ Մենք կարող ենք քաղաքականապես կորեկտ ու սիրալիր լինել և ասել, թե նա է կառավարում։ Բայց ոչ։ Նա շատ է վախենում կարտելներից։ Ես նրան մի քանի անգամ հարցրել եմ՝ ուզում է, որ մենք հեռացնենք այդ կարտելներին։ Իսկ նա՝ ոչ-ոչ, պարոն նախագահ, պետք չէ, խնդրում եմ։ Բայց մենք ինչ-որ բան պետք է անենք»։