Վենեսուելայի նախագահին տեղափոխել են Բրուքլինի քննչական մեկուսարան

Վենեսուելայի նախագահ Նիկոլաս Մադուրոն և նրա կինը՝ Սիլիա Ֆլորեսը, որոնց ԱՄՆ հատուկ նշանակության ստորաբաժանումները բերման էին ենթարկել Կարակասում, տեղափոխվել են Նյու Յորք, հաղորդում է CNN-ը։

Վենեսուելայից նրանց դուրս էին բերում ամերիկյան «Իվոջիմա» ուղղաթիռակիր նավով։ Հունվարի 3-ի երեկոյան ՀԴԲ ինքնաթիռը նրանց տեղափոխել է Նյու Յորքի նահանգում գտնվող Ստյուարտ ավիաբազա։ Այնտեղից Մադուրոյին և նրա կնոջը ուղղաթիռով տեղափոխել են Մանհեթեն՝ Թմրամիջոցների դեմ պայքարի վարչության (DEA) կենտրոնակայան, որտեղ նրանց կենսաչափական տվյալները վերցվել են։

Դրանից հետո ամուսիններին տեղավորել են Բրուքլինի դաշնային քննչական մեկուսարան։

Սպիտակ տունը հրապարակել է տեսանյութ, որտեղ Մադուրոն ձեռնաշղթաներով քայլում է միջանցքով՝ DEA-ի գործակալների ուղեկցությամբ։ Տեսանյութում լսվում է, թե ինչպես նա անգլերեն ասում է. «Բարի երեկո։ Շնորհավոր Նոր տարի»։

NBC News-ի տվյալներով՝ արդեն երկուշաբթի, հունվարի 5-ին, Մադուրոն և Ֆլորեսը կարող են դատարանի առաջ կանգնել Նյու Յորքում։

Հիշեցնենք՝ հունվարի 3-ին ԱՄՆ-ն ռազմական գործողություն է իրականացրել Վենեսուելայի դեմ։ ԱՄՆ նախագահ Դոնալդ Թրամփը հաստատել է, որ ԱՄՆ-ն հարվածներ է հասցրել Վենեսուելայում գտնվող օբյեկտներին, երկրից դուրս է բերել նախագահ Նիկոլաս Մադուրոյին: Ամերիկյան կողմի տվյալներով՝ Մադուրոյին և նրա կնոջը Նյու Յորքում մեղադրանք է առաջադրվել «թմրահաբեկչության», կոկաինի մաքսանենգության և զենք պահելու համար: Թրամփը հրապարակել է Մադուրոյի՝ առևանգումից հետո առաջին լուսանկարը։