10.10.2026 | 12:57
Նավթի գներն աճել են
ԱՄՆ-ը հատուկ գործողությունների ինքնաթիռներ է տեղակայել Կարիբյան ավազանում. WSJ
Քաղաքականություն
24.12.2025 | 20:47
Այս շաբաթ Միացյալ Նահանգները մեծ թվով ռազմաօդային ուժերի հատուկ գործողությունների ինքնաթիռներ, զորքեր և սարքավորումներ է տեղակայել Կարիբյան ավազանում, հաղորդում է The Wall Street Journal-ը, փոխանցում է Current time-ը։
Աղբյուրների և հետևող համակարգերի համաձայն՝ դեկտեմբերի 22-ին տարածաշրջան են ժամանել առնվազն 10 V-22 Osprey ինքնաթիռ և C-17 բեռնատար ինքնաթիռներ։ Աղբյուրներից մեկի խոսքով՝ ինքնաթիռում եղել են զինվորական անձնակազմ և սարքավորումներ։ Տեղակայված զորքերի և սարքավորումների ճշգրիտ տեսակները չեն նշվում։
Լատինական Ամերիկայում ռազմական գործողությունները վերահսկող ԱՄՆ Հարավային հրամանատարության ներկայացուցիչը հրաժարվել է մեկնաբանել կոնկրետ տեղաշարժերը՝ նշելով, որ ցանկացած ռազմական օբյեկտում սարքավորումների և անձնակազմի ռոտացիան ստանդարտ պրակտիկա է:
Սպիտակ տունը և Պենտագոնը չեն պատասխանել The Wall Street Journal-ի հարցումներին:
Աշնան սկզբից ի վեր Միացյալ Նահանգները մեծացնում է իր ռազմական ներկայությունը Կարիբյան ավազանում՝ Վենեսուելայի հետ լարվածության սրման ֆոնին: Տարածաշրջանում տեղակայված են ռազմանավերի նավատորմ, այդ թվում՝ ժամանակակից «Ջերալդ Ֆորդ» ավիակիրը և հինգ ականակիր, ավիակիր հարվածային խումբ, ծովային հետևակի ստորաբաժանումներ, կործանիչներ, էլեկտրոնային պատերազմի ինքնաթիռներ և փրկարարական ուղղաթիռներ:
Վերջին ամիսներին Միացյալ Նահանգները հարվածներ է հասցրել այն նավերին, որոնք, ամերիկյան կողմի պնդմամբ, թմրանյութեր են տեղափոխում և կապված են Վենեսուելայի հետ, ինչպես նաև առգրավում է Կարակասի հետ համագործակցող նավթատար նավերը։ ԱՄՆ նախագահ Դոնալդ Թրամփը չի բացառել Վենեսուելայի վրա հարվածների հնարավորությունը։
Associated Press-ը դեկտեմբերի 23-ին հայտնել էր, որ Մոսկվան դեկտեմբերի 19-ից տարհանում է դիվանագետների ընտանիքներին Վենեսուելայից, սակայն Ռուսաստանի արտաքին գործերի նախարարությունը չի հաստատել այս տեղեկատվությունը։
Թարգմանությունը՝ Էմմա Չոբանյանի
