Գևորգ Կոստանյանը նախատեսվածից շուտ է արտագաղթելու Ստրասբուրգ. քննիչ հանձնաժողովը՝ փակուղու առջև

Այսօր նախատեսված էր ԱԺ քննիչ հանձնաժողովի նիտը, որը, սակայն, տապալվեց՝ քվորում չլինելու պատճառով:

Factor.am-ին հայտնի դարձավ, որ հանձնաժողովի անդամները այլևս լուրջ չեն վերաբերվում այս հանձնաժողովի աշխատանքներին, քանի որ երեքշաբթի օրը՝ նոյեմբերի 13-ին, այս հանձնաժողովի լիազորությունները դադարում են:

ԱԱԾ տնօրենի և ՀՔԾ պետի գաղտնալսման գործով ստեղծված հանձնաժողովը ստեղծվել էր երկու ամիս ժամկետով և հիմա հանձնաժողովի նախագահ Գևորգ Կոստանյանը պատրաստվում է երեքշաբթի ԱԺ հերթական նիստի օրակարգ մտցնել նաև քննիչ հնձնաժողովի լիազորությունների երկարացման հարցը:

Եթե առաջարկին կողմ քվեարկի 53 պատգամավոր, ապա հանձնաժողովի լիազորությունները կերկարաձգվեն ևս երկու ամսով: Այսօր տապալված նիստը տեղափոխվել է առաջիկա ուրբաթ, որտեղ հանձնաժողովականները որոշելու են երկարաձգման հարցը լիագումար նիստի օրակարգ մտցնելու հարցը:

Միաժամանակ հարցաքննության են գալու Ռոբերտ Քոչարյանի կալանքի միջնորդությունը ներկայացրած քննիչը, Քոչարյանի գործով խմբի ղեկավարը և ՀՔԾ պետ Սասուն Խաչատրյանը: Եթե ստացվի այնպես, որ հանձնաժողովը շարունակում է իր լիազորությունները, ապա հաջորդ հարցաքննվողները լինելու են Քոչարյանի գործը վերահսկող դատախազն ու ՀՀ գլխավոր դատախազ Արթուր Դավթյանը:

Factor.am-ի տեղեկություններով, եթե ԱԺ պատգամավորներից 53-ը կողմ չլինի քննիչ հանձնաժողովի լիազորություների ժամկետի երկարացմանը, ապա հանձնաժողովի նախագահ Գևորգ Կոստանյանն արտագաղթելու է Հայաստանից:

Մեզ հայտնի դարձավ, որ նա գնալու է Ստրասբուրգ: Բանն այն է, որ Կոստանյանը որոշել էր արտագաղթը հետաձգել մինչև 7-րդ գումարման ԱԺ-ի ձևավորումը, սակայն, հիմա հաշվի առնելով, որ հանձնաժողովը չի լինելու, որոշել է ավելի շուտ մեկնել:

Երկրից հեռանալու տեղեկությունները Factor.am-ի հետ զրույցում չհերքեց նաև Գևորգ Կոստանյանը: Այս մասին նա խոստացավ հարցազրույց տալ մեկ-երկու օրից:

Հայկ վարդանյան