01.11.2026 | 15:55
Հանրապետությունում ջերմաստիճանը կնվազի 4-7 աստիճանով
«2026» թիվը կդրվի հրապարակի շատրվանների հարակից տարածքում․ ավելի քան 18 միլիոն դրամ՝ Դիլիջանի ամանորյա զարդարանքի համար
Հասարակություն
10.12.2025 | 19:37
Factor.am-ն ուսումնասիրում է Հանրապետության տարբեր համայնքներում ամանորյա զարդարանքի համար հայտարարված մրցույթները, հաղթած ընկերություններն ու իրականացվող ծախսերը։
Factor.am-ը գնումների համակարգից տեղեկանում է, որ Տավուշի մարզի Դիլիջան քաղաքում ամանորյա ձևավորումն այս տարի իրականացնում է «Նարեկ Դավթյան Էդվարդի ԱՁ»-ն, որը հաղթել է էլեկտրոնային աճուրդում։ Անհատ ձեռնարկատերը ծառայությունը մատուցում է 18 միլիոն 600 հազար դրամով։
Պայմանագրի տեխնիկական բնութագրի ուսումնասիրությունից տեղեկանում ենք, որ անհատ ձեռնարկատերը պետք է Դիլիջանի կենտրոնական հրապարակում տեղադրի 5 մետր բարձրությամբ 2 տոնածառ, և 7 մետր բարձրությամբ 1 տոնածառ։
Տոնածառերը պետք է զարդարվեն թարթող ջրակայուն լույսերով, առնվազն 200-250 խոշոր խաղալիքներով, որոնց տեսակները և գույները ձեռնարկատերը պետք է համաձայնեցնի համայնքապետարանի հետ։
«Հրապարակի սկզբնամասում տեղադրել «2026» թվերի հավաքածու, որի «6» թիվը պետք է պատրաստվի երկաթե կոնստրուկցիայով, իսկ «2 0 2» թվերը տրամադրվելու են պատվիրատուի կողմից, որոնք պետք է զարդարված լինեն լուսաշղթաներով, լամպերի հեռավորությունը՝ 25սմ, հզորությունը՝ 6W-2700K:
«2026» թիվը անհրաժեշտ է տեղադրել կենտրոնական հրապարակի շատրվանների հարակից տարածքում: Տեղադրել և զարդարել սպիտակ LED լուսաշղթաներով մեկ հատ սահնակ, մեկ հատ երկաթե կոնստրուկցիաներով հավաքած մեծ գունդ 2 մետր տրամագծով, մեկ հատ միջին գունդ 1,5 մետր տրամագծով, երկու հատ հրեշտակներ 1.5-2.0 քմ ոչ պակաս մակերեսով, մեկ հատ մեծ կոնֆետ՝ 80սմ x 80սմ-ով, և մեկ հատ փոքր կոնֆետ՝ 50սմ×60սմ-ով, որոնք տրամադրվելու են պատվիրատուի կողմից»,- նշված է պայմանագրի տեխնիկական բնութագրում։
Անհատ ձեռնարկատերը պարտավոր է նաև հրապարակի երկու ծաղկանոցները զարդարել սպիտակ LED ժապավենով, տոնածառի թարթող ջրակայուն լույսերով, որոնք նախատեսված են բացօթյա ձևավորումների համար: Տոներից հետո դրանք անհրաժեշտ է հանձնել պատվիրատուին։
Քաղաքապետարանի շենքի ճակատային մասը ևս պետք է զարդարվի սպիտակ LED լուսաշղթաներով, այդ թվում՝ ճակատային մասի պատուհանները:
Քաղաքապետարանի շենքի մուտքը պետք է ձևավորվի եղևնու ճյուղերով և լույսերով։ Շենքի առաջին հարկում պետք է տոնածառ տեղադրվի։
Տեխնիկական բնութագրի համաձայն՝ պետք է զարդարվեն նաև Օղակաձև այգին, 25 կանգառներ, 5 կամուրջներ, Մաքսիմ Գորկու փողոցը, Մյասնիկյան փողոցն ու Շահումյան փողոցը։
Աղավնավանք, Խաչարձան, Գոշ, Հովք, Հաղարծին և Թեղուտ բնակավայրերը ևս պետք է զարդարվեն։ Անհատ ձեռնարկատերը պետք է բնակավայրերի վարչական ղեկավարներին տոնածառի թափվող լույսեր տրամադրի։
Արփի Հակոբյան
