14.12.2025 | 18:20
Թաիլանդն ու Կամբոջան շարունակում են ռազմական գործողությունները
«Մշակութային կրթության աջակցության» հիմնադրամը 10 տարեկան է
Մշակույթ
02.11.2018 | 12:16
2018 թ. նոյեմբերի 2-ին, ժամը 18:00-ին, Կամերային երաժշտության տանը կկայանա տոնական համերգ-ցուցահանդես՝ նվիրված «Մշակութային կրթության աջակցության» հիմնադրամի 10-ամյակին. տեղեկացնում է ՀՀ մշակույթի նախարարությունը:
2008 թվականից հիմնադրամը ՀՀ մշակույթի նախարարության աջակցությամբ ծավալել է կարևոր ու բազմաբնույթ գործունեություն ՀՀ մարզերի և Արցախի Հանրապետության գեղարվեստական կրթություն իրականացնող ուսումնական հաստատություններում, իրականացրել է բազմաթիվ կրթական, մշակութային ծրագրեր, նախագծեր: Հիմնադրամն իր շուրջն է համախմբել տասնյակ վաստակաշատ մանկավարժների, որոնք արժեքավոր ներդրում ունեն մշակութային կրթության ոլորտում իրականացվող ուսումնամեթոդական աշխատանքների, վարպետության դասերի կազմակերպման գործում:
Ցուցահանդեսին մասնակցում են ՀՀ Արարատի, ՀՀ Արագածոտնի, ՀՀ Արմավիրի, ՀՀ Գեղարքունիքի, ՀՀ Լոռու, ՀՀ Կոտայքի, ՀՀ Շիրակի, ՀՀ Սյունիքի, ՀՀ Վայոց ձորի, ՀՀ Տավուշի մանկական գեղարվեստի դպրոցների սաների աշխատանքները:
Համերգային ծրագրում մասնակցում են ՀՀ Կոտայքի, ՀՀ Արագածոտնի, ՀՀ Լոռու, ՀՀ Արարատի, ՀՀ Արմավիրի, ՀՀ Շիրակի մարզերի երաժշտական դպրոցներում սովորող պատանի երաժիշտ-կատարողներ, ովքեր կկատարեն հայ և արտասահմանյան կոմպոզիտորների ստեղծագործություններ: Տոնական համերգի ընթացքում կհնչեն ջութակահարների, ժողովրդական նվագարանների և վոկալ-գործիքային համույթների կատարումներ, իսկ նախասրահում կհնչի Երևանի Սայաթ-Նովայի անվան երաժշտական դպրոցի լարային քառյակը:
Երեկոյի ընթացքում կցուցադրվի «Մշակութային կրթության աջակցության» հիմնադրամին նվիրված տեսաֆիլմ, որը կլուսաբանի հիմնադրամի 10-ամյա գործունեությունը:
