Այդ 50-հարկանի շենքը եթե հրդեհվի, մարդկանց ո՞նց են փրկելու, մեքենաները որտե՞ղ են կանգնելու. Ասլան Մխիթարյան. ՏԵՍԱՆՅՈՒԹ

«Սարյան փողոցը տեղից էլ ծանրաբեռնված էր, այն դարձրին միակողմանի, բայց խցանումների հարցը չլուծվեց, մնաց ծանրաբեռնված, այդ 50-հարկանի երկնաքերի սպասարկումն ինչի՞ հաշվին է լինելու, մեքենաները որտե՞ղ են կանգնելու, կամ այդ շենքը եթե հանկարծ հրդեհվի, ո՞նց ենք այդ մարդկանց՝ բնակիչներին փրկելու։ Անգամ 16-հարկանի շենքի համար Երևանում հակահրդեհային համակարգ չունենք։ Էլ չեմ ասում, որ մենք սեյսմիկ գոտում ենք, երկրաշարժի դեպքում ինչեր կարող են լինել․․․»,- Factor TV-ի հետ զրույցում նշում է ճարտարապետ Ասլան Մխիթարյանը՝ անդրադառնալով «Հայփոստ»-ի արդեն նախկին շենքը քանդելու և դրա փոխարեն 50-հարկանի երկնաքեր կառուցելու նախագծին։

Նրա խոսքով՝ աշխարհի մի շարք քաղաքներ չունեն երկնաքերեր և հենց դրանով էլ հմայիչ են․ «Մենք ունենք աղտոտված քաղաք, կանաչի պակաս և բնակելի շենքեր կառուցելու անվերջ մոլուցք, իսկ դա որևէ օգուտ չի տալիս քաղաքին»։

Կասկադի համահեղինակը խոսում է նաև համալիրի արդիականացման մասին։ Չնայած ճարտարապետների մտահոգություններին, դրա կառուցապատման ծրագիրը մտել է գործնական փուլ․ «Ֆրանսիացի ճարտարապետի առաջարկած նախագծի արդիականը ո՞րն է․ այդտեղ ո՛չ արվեստ կա, ո՛չ մտահղացում։ Կասկադի աջ կողմի երկայնքով նախատեսում են բնակելի շենքեր կառուցել․ դա ևս խցանումներ է առաջացնելու կենտրոնում»։

Ճարտարապետը նկատում է՝ Թամանյանը ժամանակին եկավ փոշոտ քաղաք, որտեղ կանաչը պակաս էր, իր ձեռամբ Երևանը կանաչապատվեց․ «Հիմա հարյուր տարի անց մենք այդ կանաչը ոչնչացնում ենք՝ քաղաքին ոչինչ չտալով, փոշոտում ենք Երևանը՝այն դարձնելով «Էրիվան», ինչպիսին Թամանյանից առաջ էր»։

Մանրամասները՝ տեսանյութում։

Աննա Բաբաջանյան