ՖԻՖԱ-ի նախագահը ցավակցել է Նիկիտա Սիմոնյանի մահվան կապակցությամբ

ՖԻՖԱ-ի նախագահ Ջանի Ինֆանտինոն ցավակցական ուղերձ է հղել 99 տարեկանում կյանքից հեռացած լեգենդար ֆուտբոլիստ և մարզիչ Նիկիտա Սիմոնյանի մահվան կապակցությամբ։

«Ցավով տեղեկացա, որ 99 տարեկանում կյանքից հեռացել է Նիկիտա Սիմոնյանը՝ ԽՍՀՄ հավաքականի ավագը, որն իր թիմին դուրս բերեց իր երկրի պատմության մեջ առաջին աշխարհի առաջնություն ու խփեց առաջին գոլը եզրափակիչ մրցաշարում։

Նա 1956 թվականի Օլիմպիական խաղերում ոսկե մեդալ նվաճած թիմի վերջին խաղացողն էր ու կյանքի մեծ մասը նվիրել է ֆուտբոլին։

ՖԻՖԱ-ի բոլոր աշխատակիցների և համաշխարհային ֆուտբոլային ընտանիքի անունից իմ անկեղծ ցավակցությունն եմ հայտնում նրա ընտանիքին, ընկերներին և բոլոր նրանց, ովքեր ճանաչել ու աշխատել են նրա հետ»,- սոցցանցերում գրել է Ջանի Ինֆանտինոն։

Ռուսաստանի ֆուտբոլային միության առաջին փոխնախագահ Նիկիտա Սիմոնյանը կյանքից հեռացել էր նոյեմբերի 23-ին։ Հոկտեմբերի 12-ին նա դարձել էր 99 տարեկան։ Հրաժեշտի արարողությունը կկայանա նոյեմբերի 27-ին Մոսկվայի «Սպարտակի» տնային ստադիոն «Լուկոյլ Արենայում»։ Ֆուտբոլային կարիերայի ընթացքում Նիկիտա Սիմոնյանը խաղացել է Սուխումիի «Դինամոյում», Մոսկվայի «Սպարտակում» և «Կռիլյա Սովետովում»։ «Սպարտակի» հետ նա մարզիչի ու ֆուտբոլիստի կարգավիճակում դարձել է ԽՍՀՄ վեցակի չեմպիոն ու հնգակի գավաթակիր։ Սիմոնյանը նաև 160 գոլով «Սպարտակի» պատմության լավագույն ռմբարկուն է: ԽՍՀՄ-ի հավաքականի կազմում Նիկիտա Սիմոնյանը ոսկե մեդալակիր է դարձել 1958թ․ Մելբուրնի Օլիմպիական խաղերում։ Ֆուտբոլում ունեցած մեծ ավանդի համար 2000-ին նա արժանացել է ՖԻՖԱ-ի շքանշանի։ Մարզչական կարիերայի ընթացքում Նիկիտա Սիմոնյանը գլխավորել է ԽՍՀՄ հավաքականը, իսկ 1973-1974թթ․ աշխատել է «Արարատում»՝ դառնալով ԽՍՀՄ-ի չեմպիոն: Նա երևանյան ակումբը գլխավորել է նաև 1984-1985թթ․: 1992 թվականից Նիկիտա Սիմոնյանը զբաղեցնում էր Ռուսաստանի ֆուտբոլային միության առաջին փոխնախագահի պաշտոնը։