19.08.2026 | 16:31
Վահագն Ալեքսանյանի ճեպազրույցը՝ ՈՒՂԻՂ
Հայաստանի բնակչության 65.1%-ը իրեն չի կարող առողջ սննդակարգ թույլ տալ․ Ռուբեն Մարկոսյան
Հասարակություն
25.11.2025 | 15:00
«Մեր բնակչության 65.1%-ը չի կարող իրեն թույլ տալ առողջ սննդակարգ»,- այս մասին «Նվազագույն աշխատավարձը և սոցիալ-տնտեսական իրողությունները Հայաստանի Հանրապետությունում» թեմայով քննարկման ժամանակ հայտարարեց ուսումնասիրության հեղինակներից մեկը՝ տեխնիկական գիտությունների թեկնածու, դոցենտ Ռուբեն Մարկոսյանը։
Ըստ վիճակագրական տվյալների՝ հուլիս-օգոստոս ամիսներին միջին աշխատավարձը երկրում 300,000 դրամի շրջանակում է եղել։
«Սեպտեմբերի վերաբերյալ էլ տվյալներ կան, մի փոքր ցածր է, բայց միջին տարեկանը կրկին 295,000-ի չափ է։ Մեր ֆոկուս խմբային հարցումները ցույց են տալիս, որ մեկ ընտանիքի համար, նույնիսկ երկու աշխատողի դեպքում, հենց այդքան գումար էլ մարդիկ պարտադիր նշում են, հենց նվազագույն աշխատավարձ ստացող մարդիկ, որ այդ նվազագույն կենսական ծախսերը կարողանան հոգալ։ Այսինքն՝ մեր երկրում ընդհանուր գների ֆոնի վրա, ընդհանուր պատկերի ֆոնի վրա, ունենք իսկապես բավականին ոչ գոհացուցիչ, ոչ բավարար միջին աշխատավարձ»,- նշեց նա։
Մարոսյանի խոքով՝ ուսումնասիրության ընթացքում իրենց համար հետաքրքիր փաստեր են հայտնաբերում։
«Ըստ միջազգային հրապարակված տվյալների, մեր բնակչության 65.1%-ը չի կարող իրեն թույլ տալ առողջ սննդակարգ։ Այսինքն՝ հենց փաստը դրանումն է, հենց այդ միջին աշխատավարձի այդ մակարդակն էլ հենց դրա մասին է խոսում։ Այսինքն՝ մենք, և նաև առողջ սննդակարգի արժեքը մեկ շնչին, մեկ օրվա համար Հայաստանում մոտ 4.2 դոլարի համարժեք է գնահատվում։ Անկեղծ ասած, ես այս ցուցանիշից զարմացա, բայց օբյեկտիվ, կարծես թե, պատկեր է արտահայտում։ Կարևորը նա է, որ իսկապես երկրում արտադրողականությունը, երկրում տնտեսությունը դեռ չունի այն մակարդակը, որ թե՛ նվազագույն աշխատավարձը, թե՛ միջին աշխատավարձը լինի ինչ-որ ընդունելի սահմաններում, և, բնականաբար, երբ որ նրա հարաբերական մեթոդով դուրս ենք բերում նվազագույն աշխատավարձը, կրկին շատ դեպքերում հիասթափվում ենք՝ հասկանալով, որ դա արժանապատիվ կյանքի և աշխատանքի, ոնց որ, պայմաններ չի ապահովում»,- ասաց նա։
Ռուբեն Մարկոսյանի խոսքով՝ ըստ նույն ուսումնասիրության՝ մտահոգիչ է նաև ցուցանիշի աճող դինամիկան, 2017-ին նույն ցուցանիշը կազմել է 49 տոկոս։
Եվգենյա Համբարձումյան
