«Ավետիք Աթաբեկյանն անձամբ ա խփել Տիգրան Խաչատրյանին, նկարը կա՝ ոնց ա ընկել կաբինկի դեմը»․ Քլոյան․ ՏԵՍԱՆՅՈՒԹ

Ազգային ժողովում շարունակվում է ««Մարտի 1-ի գործի» քննությունը նախորդող ժամանակահատվածում, «Մարտի 1-ի գործի» վերաիմաստավորումը «Ֆարմանյանը և այլք ընդդեմ Հայաստանի» գործով կայացված վճռի լույսի ներքո» թեմայով հանրային քննարկումը:

Այդ իրադարձությունների ժամանակ զոհված Գոռ Քլոյանի հայրը՝ Սարգիս Քլոյանը, նույնպես մասնակցում է քննարկմանը։ Նա Հակակոռուպցիոն կոմիտեի նախագահ Արթուր Նահապետյանից հետաքրքրվեց՝ պարզվե՞լ է, թե ով է հրաման տվել կիրառել «Չերյոմուխա 7» տեսակի զենքը, որի կիրառությունն արգելված է։

Ի պատասխան Նահապետյանը նշեց, որ անձանց մեղադրանք ներկայացնելու համար փամփուշտի և զենքի հստակ նույնականացում է անհրաժեշտ․ «Եթե նույնականացում չունենանք, անորոշ շրջանակի չեն կարող մեղադրանք ներկայացնել»։

Քլոյանը շարունակեց․ համոզված է, որ ոստիկանության զորքերի հատուկ նշանակության ջոկատի ենթասպա Ավետիք Աթաբեկյանն է սպանել «Մարտի 1»-ի զոհերից Տիգրան Խաչատրյանին։

«Աթաբեկյանի հրամանատարն ասում է՝ ես եմ հրաման տվել, որ իր ենթական կրակի «գռուզավոյ» մեքենայի «կաբինկին»։ Այդ ժամանակ Տիգրան Խաչատրյանը երեսն ասֆալտին ընկած էր այդ նույն մեքենայի մոտ։ Աթաբեկյանն ասել է՝ տեսել է, որ ղեկին վարորդ է նստած եղել, ես ձգանը ձախ թեքեցի, այդ ժամանակ կրակեցի։ Բա դու չտեսա՞ր մեքենայի դռան հայելուց բռնված Տիգրան Խաչատրյանին, «կաբինկի» մեջի նստածին տեսար։ Փաստ ա, որ Ավետիք Աթաբեկյանն անձամբ ա խփել Տիգրան Խաչատրյանին, նկարը կա՝ ոնց ա ընկել կաբինկի դեմը»,- նշեց Քլոյանը։

Մանրամասները՝ տեսանյութում։