31.10.2026 | 17:23
Երևանում բացվել է «ՀայՓաս»-ի երկրորդ գրասենյակը
Թուրքական հրշեջ ինքնաթիռ է կործանվել․ օդաչուն զոհվել է
Քաղաքականություն
14.11.2025 | 12:21
Թուրքիայի Գյուղատնտեսության և անտառտնտեսության նախարարությունը հայտարարել է, որ Խորվաթիայում պլանային սպասարկման թռիչքի ժամանակ վթարի է ենթարկվել Անտառտնտեսության գլխավոր վարչության (OGM) հրշեջ ինքնաթիռը։ Նախարարությունը հաստատել է, որ միջադեպի ժամանակ օդաչուն զոհվել է, գրում է Bianet-ը։
Հաղորդվում է, որ նախօրեին տեղական ժամանակով 10:24-ին OGM-ի կողմից շահագործվող երկու AT802 հրշեջ ինքնաթիռներ մեկնել են Չանաքքալեի հյուսիսարևմտյան նահանգից՝ ուղևորվելով Զագրեբ՝ պլանային սպասարկման համար։ Անբարենպաստ եղանակային պայմանների պատճառով երկու ինքնաթիռներն էլ գիշերային վայրէջք են կատարել Ռիեկայի օդանավակայանում: Դրանից հետո երկու ինքնաթիռներն էլ ուղևորվել են Զագրեբ, սակայն եղանակի վատթարացման պատճառով ստիպված են եղել վերադառնալ Ռիեկա։
«Ինքնաթիռներից մեկն անվտանգ վայրէջք է կատարել Ռիեկայի օդանավակայանում։ Մյուս ինքնաթիռի հետ ռադիոկապը կորել է տեղական ժամանակով 18:25-ին՝ վերադարձի թռիչքի ժամանակ»,- ասվում է հայտարարության մեջ։
Խորվաթիայի իշխանությունների հետ համակարգված որոնողական-փրկարարական աշխատանքներ են սկսվել։ Ավելի ուշ Թուրքիայի գյուղատնտեսության և անտառտնտեսության նախարար Իբրահիմ Յումակլին հաստատել է, որ ինքնաթիռի բեկորները հայտնաբերվել են, օդաչուն մահացած է գտնվել։
«Խորվաթիայում ռադիոկապը կորցրած OGM հրշեջ ինքնաթիռի բեկորները հայտնաբերվել են։ Ցավոք, մեր օդաչուն նահատակվել է»,- հայտարարել է նա։
Հիշեցնենք, որ ավելի վաղ Ադրբեջան-Վրաստան սահմանին վթարի էր ենթարկվել Թուրքիայի ՊՆ-ի C-130 ռազմական բեռնատար ինքնաթիռի, որում գտնվող բոլոր 20 զինծառայողները զոհվել էին։
Թարգմանությունը՝ Էմմա Չոբանյանի
