Դատավոր Արմինե Սաֆարյանը հրաժարականի դիմում է ներկայացել

Երևանի ընդհանուր իրավասության դատարանի դատավոր Արմինե Սաֆարյանը հրաժարականի դիմում է ներկայացրել։ Այս մասին տեղեկանում ենք ԲԴԽ կայքից։ ԲԴԽ նախագահ Արթուր Աթեբեկյանի՝ կայքում տեղադրված հայտարարության համաձայն՝ Արմինե Սաֆարյանի լիազորությունները դադարել են։

«Հայաստանի Հանրապետության դատական օրենսգիրք» սահմանադրական օրենքի 160-րդ հոդվածի 1-ին մասի 1-ին կետի համաձայն՝ դատավորի լիազորությունները դադարում են, եթե նա հրաժարական է ներկայացնում:

«Հայաստանի Հանրապետության դատական օրենսգիրք» սահմանադրական օրենքի 160-րդ հոդվածի 2-րդ մասի համաձայն` սույն հոդվածի 1-ին մասի 1-ին կետի հիմքով դատավորի լիազորությունները դադարում են այդ հարցի համար հրավիրված Բարձրագույն դատական խորհրդի նիստում դատավորի կողմից իր հրաժարականը պնդելու կամ այդ նիստին դատավորի չներկայանալու օրվանից:

«Հայաստանի Հանրապետության դատական օրենսգիրք» սահմանադրական օրենքի 160-րդ հոդվածի 5-րդ մասի համաձայն՝ սույն հոդվածի 1-ին մասի 1-ին և 6-րդ կետերով նախատեսված հիմքերով դատավորի լիազորությունները դադարելու դեպքում Բարձրագույն դատական խորհրդի նախագահն անհապաղ հայտարարություն է տարածում դատական իշխանության պաշտոնական կայքում:

Ելնելով վերոգրյալից՝ հայտարարվում է, որ Բարձրագույն դատական խորհրդի 2025 թվականի նոյեմբերի 10-ի թիվ ԲԴԽ-81-Ո-145 որոշմամբ՝ 2025 թվականի նոյեմբերի 10-ից Երևան քաղաքի առաջին ատյանի ընդհանուր իրավասության քաղաքացիական դատարանի դատավոր Արմինե Գևորգի Սաֆարյանի կողմից ներկայացված հրաժարականի դիմումի հիման վրա վերջինիս լիազորությունները դադարել են»,- գրված է հայտարարության մեջ։

Նշենք, որ Արմինե Սաֆարյանի վերաբերյալ ԲԴԽ-ում  կարգապահական վարույթ կար, որի հետ կապված դեռևս որոշում չէր կայացվել։ Մինչ այս վարույթը Սաֆարյանի վերաբերյալ մեկ այլ վարույթ է եղել, որի շրջանակում նա կարգապահական պատասխանատվության է ենթարկվել։ Այս դեպքում ցանկացած տույժ կհանգեցներ դատավորի լիազորությունների դադարեցման։

Արաքս Մամուլյան