Տնտեսության կառուցվածքը պետք է փոխվի. այն, ինչը կա՝ երկարաժամկետ կայուն աճի հեռանկար չի ստեղծում. Արտակ Մանուկյան․ ՏԵՍԱՆՅՈՒԹ

Ինչպես նախորդ Կառավարությունների ժամանակ, այնպես էլ ներկայիս՝ գործող Կառավարության տնտեսական ցուցանիշների գնահատման հիմքում պետք է դրվի մեթոդաբանություն, որի բացակայության դեպքում կարող ենք ունենալ 7 տոկոսանոց տնտեսական աճ, բայց չունենալ տնտեսական զարգացման տեսլական, և հակառակը՝ կարող ենք արձանագրել 2 տոկոսանոց տնտեսական աճ և ունենալ նման զարգացման տեսլական։

Այս մասին այսօր «Տնտեսության ակտիվությունը դանդաղում է․ տնտեսական, թե քաղաքական պատճառներ» թեմայով քննարկման ժամանակ
ասաց ՀՀ վարչապետի խորհրդական Արտակ Մանուկյանը՝ ներկայացնելով տնտեսության աճի տեմպերի վիճակագրությունը։

«Ասում են տնտեսական աճը դանդաղել է, իհարկե՛ դանդաղել է, բայց եթե ուսումնասիրենք մեր տնտեսության կառուցվածքը, կտեսնենք, որ օգոստոս-սեպտեմբեր ամիսներին միշտ էլ եղել են թույլ ազդակներ։ 2018 թ համար նախատեսված է եղել 5,8 տոկոս տնտեսական ակտիվության ցուցանիշ, հիմա կա 6,5 տոկոս։ Իսկ երբ նախորդ տարի տնտեսությունը փակվեց 7,5 տոկոս աճով, դա պայմանավորված էր հիմնականում հոկտեմբեր ամսվա 16 %, նոյեմբերին՝ 8%, դեկտեմբերին՝ 10% տնտեսական աճով։ Մենք հասկանում ենք, որ ճիշտ է միտումը դանդաղել է, բայց կա դրական ֆոն, և աճի տեմպի դանդաղումը պայմանավորված է մեր տնտեսության կառուցվածքով»,-ասաց Արտակ Մանուկյանը։

Վերջինս նշեց, որ, այնուամենայնիվ, տնտեսության մեջ կան որոշակի բացասական միտումներ, որոնք պայմանավորված են հատկապես գյուղատնտեսության ոլորտի անկման հետ, սակայն դրանք նաև սպասելի արդյունքներ են։

Արտակ Մանուկյանը նաև շեշտեց, որ նախորդ տարվա արձանագրած տնտեսական ցուցանիշի մեջ մեծ դերակատարում է ունեցել հանքարդունաբերությունը, որն այս տարի ունեցել է զարգացման վատ հեռանկար։

«Տնտեսության կառուցվածքը պետք է փոխվի, որովհետև այն, ինչը կա երկարաժամկետ կայուն աճի հեռանկար չի ստեղծում, իսկ փոփոխությունը ենթադրում է, որ մենք պետք է պատրաստ լինենք որոշակի ցուցանիշներ զոհել ֆորմալ առումով»,-ասաց վարչապետի խորհրդականը։

Մանրամասները՝ տեսանյութում։