09.06.2026 | 15:10
«Հայաստան» դաշինքը ՍԴ կդիմի // Քվեների վերահաշվարկ մի շարք ընտրատեղամասերում․ ԼՈՒՐԵՐ
Ղազախստանում Կասպից ծովի ափին կրկին հարյուրից ավելի սատկած փոկեր են հայտնաբերվել
Քաղաքականություն
04.11.2025 | 22:36
Ղազախստանի Մանգիստաուի շրջանում Կասպից ծովի ափին հայտնաբերվել է առնվազն 112 սատկած փոկ։ Այս մասին հայտնել է Մանգիստաուի շրջանային բնապահպանական վարչության մամուլի ծառայությունը, փոխանցում է Current time-ը։
Ըստ հաղորդագրության՝ էկոլոգները բազմաթիվ հաղորդագրություններ են ստացել բնակիչներից ծովափին սատկած փոկերի մասին։ Նոյեմբերի 3-ին վարչության մասնագետները ջրի նմուշներ են վերցրել Ֆորտ-Շևչենկոյի և Բաուտինոյի ափերից։ Շրջանի ձկնորսության պաշտպանության վարչության ներկայացուցիչների հետ միասին նրանք ուսումնասիրել են Ասան գյուղից մինչև Բաուտինո հրվանդանի ափը և հաշվել 112 սատկած փոկ։ Անցյալ տարի, հոկտեմբերից սկսած, նույն տարածքում զանգվածաբար սատկել էին նաև փոկեր Կասպից ծովի ափին։
Կենդանիների զանգվածային անկման պատճառը չի պարզվել ո՛չ մեկ տարի առաջ, ո՛չ էլ հիմա: Ղազախստանի պաշտոնյաները նշում են, որ փոկերի մարմինների և ջրի նմուշների վերլուծությունը լրացուցիչ ժամանակ կպահանջի։
2025 թվականի մայիսին Ղազախստանի Կասպից ծովի ափին՝ Շևչենկոյի ամրոցի մոտ, նաև տասնյակ սատկած թռչուններ էին հայտնաբերվել։
Բնապահպաններն ու տեղի բնակիչներն այս միջադեպերից մի քանիսը կապում են տարածաշրջանում գործող նավթային ընկերությունների գործունեության հետ: Ընկերությունները հերքում են ծովային կենդանիների անկմանն իրենց որևէ մասնակցություն։
Ռուսաստանի կողմից Կասպից ծովը որպես հրթիռների արձակման հարթակ օգտագործելն ավելացնում է Ուկրաինայում լայնածավալ պատերազմի մարդկային և նյութական կորուստները, ինչպես նաև վնասում է Կասպից ծովի էկոհամակարգին, գրում է «Ազատություն» ռադիոկայանը: Տեղի բնակիչները նաև ասում են, որ Ռուսաստանի ռազմական գործունեությունը, մասնավորապես, Կասպյան նավատորմի նավերի կողմից Ուկրաինայի վրա հրթիռների արձակումը, լուրջ վնաս է հասցնում՝ աղտոտելով աշխարհի ամենամեծ աղի լիճը։
Թարգմանությունը՝ Էմմա Չոբանյանի
