Դեսպանների այց՝ Սյունիք․ ԵՄ ներդրումները մարզում աճում են․ ՏԵՍԱՆՅՈՒԹ

Սյունիքի մարզի Տաթև համայնքում ոռոգման նոր համակարգ է կառուցվել։ Խնդիրը լուծելուն աջակցած կառույցների ներկայացուցիչները համայնք էին այցելել։ Ցանցը սպասարկում է Շինուհայր և Հալիձոր բնակավայրերը։ Նոր համակարգի շնորհիվ ջուր է  հասնում ավելի քան 3000 բնակչի տնտեսություն և 50 հեկտար գյուղատնտեսական հողատարածք։ 

Ծրագրի ղեկավարի խոսքով՝ նախատեսվում է ներդրումներ կատարել ավելի քան 20 նմանատիպ նախագծերում։ Ապահովելով անխափան ջրամատակարարում՝ ծրագիրն ամրապնդում է սննդի անվտանգությունը, աջակցում տեղական գյուղատնտեսությանը և փոքր բիզնեսին, որն ուղղված է կայուն կանաչ համայնքային ենթակառուցվածքների բարելավմանը։ Այդ բնակավայրերում հիմնական զբաղմունքն այգեգործությունն է․ երկու բնակավայրերն էլ առանձնահատուկ են իրենց բույսերի և հատապտուղների տեսակներով։ 

Ոռոգման համակարգը կառուցվել է «Դիմակայուն Սյունիք թիմ Եվրոպա նախաձեռնության» շրջանակում՝ Սյունիքի վերականգնման, դիմակայունության և զարգացման ծրագրի երկրորդ բաղադրիչի ներքո։ Այն համաֆինանսավորվում է Եվրամիության ու Ավստրիական զարգացման համագործակցության կողմից և իրականացվում Ավստրիայի զարգացման գործակալության միջոցով։

«Դիմակայուն Սյունիք թիմ Եվրոպա» նախաձեռնության անդամները երկօրյա այցով  Սյունիքում էին՝ ծանոթանալու ԵՄ անդամ երկրների և միջազգային այլ գործընկերների աջակցությամբ մարզում իրականացվող ծրագրերին։ Նրանք մարզի զարգացման առաջնահերթությունների և համայնքներին ուղղված աջակցության շուրջ քննարկում են ունեցել Սյունիքի մարզպետ Ռոբերտ Ղուկասյանի հետ։ 

Սյունիքում իրականացվող ծրագրերի շրջանակում Կապանում ստեղծվել է տպագրատուն, որն աշխատանք է ապահովում պրոբացիայի ծառայությունում հաշվառված և նախկին դատապարտյալների համար՝ նպաստելով նրանց վերաինտեգրմանը, արժանապատիվ կյանքին և ներառմանը։

Սրանք ընդամենը մի քանիսն են Սյունիքում իրականացվող և իրականացված  ավելի քան չորս տասնյակ ծրագրերից, որոնք «Դիմակայուն Սյունիք թիմ Եվրոպա» նախաձեռնության մաս են կազմում։ Ծրագրի 5 տարվա բյուջեն շուրջ 200 մլն եվրո է, որից 65 մլն-ը՝ դրամաշնորհային, իսկ 135 մլն-ը՝ վարկային միջոցներ են։

Մանրամասները՝ տեսանյութում։

Անի Թամրազյան