05.02.2026 | 13:26
2025-ին հանրային մուլտիպլեքսի որևէ հեռուստաընկերություն շահույթով չի աշխատել․ Տիգրան Հակոբյան. ՏԵՍԱՆՅՈՒԹԵՐ
Վարդան Ղուկասյանին մեկուսացրել են իր սենյակում, խուզարկություններ են․ Գյումրիի քաղաքապետի խորհրդական
Հասարակություն
20.10.2025 | 10:56
ԱԱԾ-ի և ոստիկանության ծառայողները գործողություններ են իրականացնում Գյումրիի քաղաքապետարանում։ Այս մասին Factor.am-ի հետ զրույցում ասաց քաղաքապետ Վարդան Ղուկասյանի խորհրդական Լիլիթ Աղեկյանը։
«Մենք էլ ենք ուզում հասկանալ՝ ինչ է կատարվում։ Մտել են քաղաքապետարան, փակել են բոլոր մուտքերը։ Ովքեր շուտ են եկել, շենքում են մնացել, ովքեր ավելի ուշ են եկել, չեն կարողանում իրենց աշխատասենյակները մտնել։ Աշխատակիցները դուրս գալ կարող են, սակայն մտնել՝ ոչ։ Քաղաքապետին մեկուսացրել են իր սենյակում, խուզարկություններ են իրականացնում, առգրավումներ։ Ինչ գործի շրջանակում, ինչի համար՝ տեղյակ չենք»,-նշեց Աղեկյանը։
Նա հերքեց այն տեղեկությունը, թե Վարդան Ղուկասյանին ձերբակալել են, ևս մեկ անգամ ընդգծեց՝ մեկուսացրել են իր աշխատասենյակում․ «ԱԱԾ աշխատակցիների հետ մենակ է»։
Տարածվող տեսանյութերից պարզ է դառնում նաև, որ քաղաքապետարանի շենքի մոտ մարդիկ են հավաքվել։ Ըստ Աղեկյանի՝ այնտեղ և՛ մտահոգ քաղաքացիներ կան, և՛ քաղաքապետարանի աշխատակիցներ, որոնց թույլ չեն տալիս մուտք գործել շենք։
Ավելի վաղ հայտնել էինք, որ Գյումրիի քաղաքապետարանում գործողություններն իրականացնում է Հակակոռուպցիոն կոմիտեն։
Եվգենյա Համբարձումյան
