01.11.2026 | 18:03
Փոթորիկներն իրական են, բայց իրական է նաև մեր ընտրությունը. Միրզոյանի ելույթը Մանամայում
Բաքվի դատարանում ՀՀ-ի կողմից, իբր, Ադրբեջանին հասցված վնասների փաստաթղթեր են ներկայացվել
Քաղաքականություն
16.10.2025 | 18:40
Բաքվի զինվորական դատարանում Արցախի ղեկավարների և մյուս հայ գերիների նկատմամբ հարուցված շինծու գործերով դատավարությունը այսօր ընթանում է փաստաթղթերի հրապարակմամբ։ Ըստ ադրբեջանական լրատվամիջոցների՝ դատական նիստում նախ ներկայացվել է Ադրբեջանին «հասցված վնասները մանրամասն նկարագրող փաստաթուղթ»։
Նշվում է, թե, իբր, «Հայաստանի ռազմական ագրեսիայի հետևանքով ռազմական գործողություններից և օկուպացիայից տուժած Ադրբեջանի տարածքներում երկրի տնտեսական սուբյեկտների գործունեությունը լիովին դադարեցվել է: Տարածաշրջանի տնտեսական ռեսուրսներմ ապօրինի կերպով շահագործվել են Հայաստանի կողմից, այդ թվում՝ բնական պաշարների շահագործման իրավունքները օտարերկրյա ընկերություններին վաճառելու միջոցով: Ադրբեջանի տնտեսությունը՝ բնակչությունը, ձեռնարկությունները և պետությունը, կրել են հսկայական վնասներ և կորուստներ»։
Բացի այդ, իբր, «Հայաստանի ռազմական ագրեսիայի և տարածքների օկուպացիայի հետևանքով Հայաստանը գրեթե 30 տարի անօրինական կերպով շահագործել է այդ տարածքներում գտնվող հանքային ռեսուրսները՝ ստանալով զգալի անօրինական շահույթ և զգալի տնտեսական վնաս հասցնելով Ադրբեջանին։ Շահագործվել են հանքային և ոչ հանքային հանքավայրերը, ինչպես նաև անօրինական կերպով օգտագործվել են բոլոր տեսակի ստորգետնյա ջրային ռեսուրսները»։
Նշվում է, թե փաստաթղթերը, իբր, ցույց են տալիս, որ Արցախի տարածքում գտնվող «ադրբեջանական հիդրոէլեկտրակայաններն անօրինական կերպով շահագործվել են օկուպացիոն ուժերի կողմից՝ առանց որևէ բնապահպանական չափանիշի պահպանման և էլեկտրաէներգիա է արտադրվել», բնակչությունը նաև զրկվել է գյուղատնտեսությամբ զբաղվելու հնարավորությունից, ինչի արդյունքում և՛ բնակչությունը, և՛ պետությունը «կրել են մեծ տնտեսական վնասներ»։
«Աղտոտման և չպայթած զինամթերքի պատճառած վնասը» վերնագրով փաստաթղթում նշվում է, թե, իբր, «Ադրբեջանի դեմ Հայաստանի ռազմական ագրեսիայի և տարածքների օկուպացիայի ընթացքում տեղադրվել են հարյուր հազարավոր ականներ, ինչի հետևանքով չպայթած զինամթերքով աղտոտվել են հսկայական տարածքներ։ Հետևաբար, այդ տարածքների Ադրբեջանի մյուս մասերին լիարժեք վերամիավորումն ապահովելու համար անհրաժեշտ կլինի զգալի ժամանակ և զգալի ֆինանսական միջոցներ»։
Թարգմանությունը՝ Էմմա Չոբանյանի
