Զախարովան հայտարարել է, որ Մոսկվան հետաքրքրված է Բաքվի հետ սերտ համագործակցությամբ

«Մենք հետաքրքրված ենք Ադրբեջանի հետ սերտ համագործակցությամբ տարբեր տարածաշրջանային ձևաչափերում՝ ԱՊՀ, ՇՀԿ, Ասիայում փոխգործակցության և վստահության ամրապնդման միջոցառումների խորհրդաժողով, Կասպյան հնգյակ և 3+3 տարածաշրջանային հարթակ, ինչպես նաև՝ Եվրասիական անվտանգության ճարտարապետության ձևավորման համատեքստում»,- այսօր կայացած ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։

«Մենք տեսնում ենք Բաքվի և Եվրասիական տնտեսական միության միջև երկխոսության ամրապնդում։ Դրա մասին է վկայում Ադրբեջանի վարչապետի՝ Եվրասիական միջկառավարական խորհրդի նիստերին պատվավոր հյուրի կարգավիճակով մասնակցելու բարի ավանդույթը։ Վերջին նման միջոցառումը տեղի է ունեցել այս տարվա սեպտեմբերի 30-ին Մինսկում։ Մենք դրական ենք գնահատում մեր համագործակցությունը Բաքվի հետ ԱՊՀ շրջանակներում։ Մեր գործընկերները ակտիվորեն ներգրավված են տարբեր ոլորտներում։ Օրինակ, այս տարի Ադրբեջանը դարձավ ԱՊՀ երեք թեմատիկ ուղղությունների  մայրաքաղաք՝ Գաբալան՝ երիտասարդական մայրաքաղաք, Լաչինը՝ մշակութային մայրաքաղաք և Գյանջան՝ սպորտային մայրաքաղաք»,-ասել է Զախարովան։

Նա նշել է, որ սեպտեմբերի 28-ից մինչև հոկտեմբերի 8-ը, Ադրբեջանի յոթ քաղաքներում հաջողությամբ անցկացվեցին ԱՊՀ 3-րդ խաղերը, որոնց մասնակցեցին ավելի քան 1500 մարզիկներ 23 մարզաձևերում:

Զախարովան նաև ընդգծել է, որ Բաքուն միացել է Դուշանբեի հոկտեմբերի 10-ի գագաթնաժողովի մի քանի եզրափակիչ փաստաթղթերին: Դրանց թվում են  պետությունների ղեկավարների հայտարարությունները միջազգային հանցագործության դեմ պայքարի և Չեռնոբիլի ատոմակայանի վթարի 40-ամյակի վերաբերյալ:

Ադրբեջանը նաև աջակցել է ահաբեկչության և ծայրահեղականության դեմ պայքարի 2026-2028 թվականների համագործակցության ծրագրի ընդունմանը, որը ԱՊՀ միջնաժամկետ փաստաթուղթ է։

Թարգմանությունը՝ Էմմա Չոբանյանի