Տնտեսություն
14.10.2025 | 19:14
«Ուշադրություն ենք դարձրել ՌԴ միգրացիոն օրենսդրության փոփոխություններին»,- այս մասին Factor.am-ին հայտնում են Արտաքին գործերի նախարարությունից` անդրադառնալով այս օրերին բեռնափոխադրում իրականացնող հայ վարորդների բարձրացրած հարցերին։
Նշենք՝ Ռուսաստանի հետ առանց վիզայի ռեժիմ ունեցող երկրների քաղաքացիների համար 2025 թվականի հունվարի 1-ից նոր սահմանափակումներ են գործում։ Չաշխատելու նպատակով ՌԴ մուտք գործողները մեկ օրացուցային տարվա ընթացքում չեն կարող գումարային 90 օրից ավելի գտնվել երկրի տարածքում։ Ստացվում է՝ ժամկետը 2 անգամ կրճատվել է։ Բեռնափոխադրում իրականացնողների դեպքում այդ 90 օրը բավականին արագ է լրանում, վարորդները չեն կարողանում անարգել մուտք գործել ՌԴ տարածք։
«Հայաստանյան կողմը խնդիրը մշտապես բարձրացնում է թե՛ երկկողմ շփումների, թե՛ ԵԱՏՄ նիստերի ընթացքում»,-հայտնում են գերատեսչությունից:
Ընդգծվում է՝ մշտապես շեշտվել է նաև, որ փոփոխությունները հակասում են ԵԱՏՄ սկզբունքներին, մասնավորապես՝ աշխատուժի ազատ շարժի կարևորագույն սկզբունքին:
«ԵԱՏՄ հիմնարար փաստաթղթերում հստակ նշված է, որ Միության անդամ բոլոր երկրների քաղաքացիներն ունեն հավասար իրավունքներ, մինչդեռ միգրացիոն օրենսդրության փոփոխությունները, մեր կարծիքով, սահմանում են անհավասար պայմաններ ԵԱՏՄ մյուս երկրների քաղաքացիների համար:
Այս ուղղությամբ աշխատանքները շարունակվում են»,- հայտնում են նախարարությունից: Հարցի առնչությամբ ԱԳՆ-ն վարորդներին խորհուրդ է տալիս դիմել ՀՀ իրավասու մարմիններին, թե որ մարմինների մասին է խոսքը՝ չի նշվում։
Factor TV-ի հետ զրույցում վարորդներն ահազանգել են՝ իրենց արտաքսման վտանգ է սպառնում․ «Կոնկրետ էս պահին ես էդ խնդրի մեջ եմ, էդ խնդրի առաջ եմ կանգնած։ Իմ 180 օրնա լրացել, ՌԴ-ում իմ քարտերը բլոկ են արել, չեմ կարողանում օգտագործել, Ռուսաստան գնալս կասկածի տակա։ Կգնամ կամ սահմանը կանցնեմ, կամ էլ զապրետ կլինի»։
