Բաքվում Արցախի ղեկավարների շինծու գործերով նիստում ՈՄԱ-ի հետ կապված փաստաթղթեր են ներկայացվել

Արցախի ղեկավարների և այլ գերիների նկատմամբ հարուցված շինծու գործերով հերթական դատական նիստն է տեղի ունեցել Բաքվի զինվորական դատարանում։ Ադրբեջանական լրատվամիջոցների հաղորդմամբ՝ նիստի ընթացքում ներկայացվել են ռազմական գործողություններին մասնակցած, իբր, վարձկանների վերաբերյալ փաստաթղթեր։

Անդրադարձ է եղել նաև ՈՄԱ-ին։ Ըստ դատարանում ներկայացված փաստաթղթի՝ ՈՄԱ-ն հիմնադրվել է Վլադիմիր Վարդանովի կողմից, որը, իբր, «սերտ ընկերական կապեր է պահպանել ՀՀ նախկին նախագահ Սերժ Սարգսյանի և նրա մերձավորների, ինչպես նաև ԱՍԱԼԱ-ի ակտիվ անդամ Ալեք Ենիգոմշյանի հետ»։ Նշվել է, թե կազմակերպության զորավարժություններն անցկացրել են ՀՀ քաղաքացիներ՝ Վարդան Ենոքյանը, Սամվել Գալստյանը, Բագրատ Բեգլարյանը, Արտակ Բագրատյանը, Լևոն Գևորգյանը, Բադալ Սաֆարյանը, Գոռ Մելքոնյանը, Գարեգին Բաղդյանը և Սպարտակ Հովհաննիսյանը: Ռուսաստանում բնակվող հայերի հետ էլ ՈՄԱ-ի գործունեության համակարգումը, իբր, կազմակերպել է Երկրապահ կազմակերպության ռուսական ներկայացուցչության պատվավոր անդամ և ՌԴ քաղաքացի Գայանե Տանանյանը: Ադրբեջանական կողմի պնդմամբ՝ ՈՄԱ-ի գործունեության համար անհրաժեշտ ֆինանսական միջոցները հիմնականում ձևավորվել են Ռուսաստանի Դաշնությունից, ինչպես նաև ԱՄՆ-ից, Ֆրանսիայից, Ավստրիայից և Լիբանանից ստացված նվիրատվություններից, հայ ձեռնարկատերերի օգնությունից և անդամավճարներից։

Բացի այդ, ադրբեջանական լրատվամիջոցների հաղորդմամբ՝ 2020 թվականի սեպտեմբերի 27-ից սկսած Լիբանանի, Ֆրանսիայի և ԱՄՆ քաղաքացիներն ակտիվորեն մասնակցել են Մատաղիսի ուղղությամբ մղվող մարտերին հայկական զինված ուժերի կողմից։ Արտասահմանյան երկրներից ժամանած կամավորական  ջոկատները, իբր, գլխավորել է «պարոն Նորիկ» անունով հայտնի Լիբանանի քաղաքացին։ Նրանց թվում են եղել Հակոբ անունով լիբանանցի և նույն անունով ԱՄՆ  քաղաքացի։

Ասվում է, թե Ֆրանսիայի քաղաքացի Ժիլբեր Մինասյանը, որը, իբր, կապված է ԱՍԱԼԱ-ի հետ, հայկական ծագումով Ֆրանսիայի 15 քաղաքացիների ուղարկել է կռվելու Արցախում։

Ավելի ուշ հրապարակվել են փաստաթղթեր 2020 թվականի հուլիսին Թովուզի և Ղազախի շրջանների բնակավայրերի  կրակոցների և այլ դեպքերի վերաբերյալ:

Հաջորդ դատական նիստը նշանակվել է հոկտեմբերի 10-ին։

Թարգմանությունը՝ Էմմա Չոբանյանի