Բաքվի դատարանում ներկայացվել են, իբր, «Հայաստանի կողմից Ադրբեջանի դեմ գործողություններում վարձկանների ներգրավման փաստաթղթեր»

Բաքվի զինվորական դատարանում ընթանում է Արցախի ղեկավարների և տարբեր այլ պաշտոնյաների շինծու գործերով դատական նիստը։ Ադրբեջանական լրատվամիջոցների հաղորդմամբ՝ նիստում ներկայացվել են, իբր, «Ադրբեջանի դեմ մարտական ​​գործողություններին մասնակցած վարձկանների վերաբերյալ փաստաթղթեր» ։

Նշվում է, թե դատական նիստին ընթերցվել են Ադրբեջանի տարբեր պետական ​​​​մարմիններից ստացված գաղտնի նամակներից հատվածներ։ Ըստ 2020 թվականի հոկտեմբերի 24-ի փաստաթղթի, իբր, մարտադաշտում կորուստները փոխհատուցելու համար Հայաստանը զգալի ջանքեր է գործադրել 44-օրյա պատերազմի ընթացքում Արցախի տարածքներում գտնվող իր զինված ուժերում օտարերկրյա քաղաքացիների հավաքագրելու համար։ Մասնավորապես, ըստ ադրբեջանական կողմի, «ՀՀ կառավարությունը և երրորդ երկրների հայկական սփյուռքի կազմակերպությունները կոչ են արել հայ համայնքի անդամներին շտապ միանալ տեղի ունեցող մարտական ​​գործողություններին»։

Նշվում է, թե «հատուկ տոմսերի վաճառքի արշավներ են կազմակերպվել նաև արտասահմանյան երկրներում, նշանակվել են հավաքատեղիներ»։ Արդյունքում, իբր, «Ֆրանսիայից, ԱՄՆ-ից, Սիրիայից, Ռուսաստանի Դաշնությունից և այլ երկրներից ժամանած օտարերկրյա ահաբեկիչ զինյալները մասնակցել են Հայաստանի կողմից օկուպացված Ադրբեջանի տարածքներում տեղի ունեցած ռազմական գործողություններին»։ Ռազմական գործողություններին մասնակցել են «ՈՄԱ-ն , ԱՍԱԼԱ-ն և այլ ահաբեկչական կազմակերպություններ»։

Մեկ այլ փաստաթղթի համաձայն, իբր, օտարերկրյա պետություններից (Սիրիա, Ռուսաստանի Դաշնություն, Իսպանիա, Կանադա, Ֆրանսիա, Հունաստան, Լիբանան, Մերձավոր Արևելք և Լատինական Ամերիկա) «վարձկաններ և տարբեր ահաբեկչական կազմակերպությունների պատկանող մարտիկներ կռվել են Ադրբեջանի զինված ուժերի դեմ՝ հայկական զինված ուժերի հետ միասին»։ Նշվում է, թե նախկինում նման «վարձկաններ հրավիրվել են հայ զինվորականների կողմից՝ հիմնականում հետախուզության, դիվերսիայի, ահաբեկչական սադրանքների և ռմբակոծությունների հետ կապված վարժանքներ անցկացնելու համար, սակայն հետագայում  ներգրավվել են մարտական ​​գործողությունների մեջ»։

Դատական նիստը շարունակվում է։

Թարգմանությունը՝ Էմմա Չոբանյանի