Ուկրաինական ԱԹՍ-ները հարվածել են «Լուկօյլ»-ի գործարանին․ ձեռնարկության տարածքում հրդեհ է բռնկվել․ ՏԵՍԱՆՅՈՒԹ

Ուկրաինական անօդաչու թռչող սարքերը հարձակվել են Վոլգոգրադի մարզի Կոտովո քաղաքում գտնվող գազի վերամշակման գործարանի վրա։ Այս մասին հաղորդում է Astra-ն, փոխանցում է Meduza-ն։

Գործարանում հրդեհ է բռնկվել, որը, ի թիվս այլ բաների, գրանցվել է NASA-ի FIRMS արբանյակային անտառային հրդեհների մոնիթորինգի նախագծի կողմից:

Շրջանի ղեկավար Անդրեյ Բոչարովը հայտնել է, որ Կոտովսկի շրջանում կաթսայատունը մասամբ վնասվել է անօդաչու թռչող սարքի բեկորների անկման հետևանքով։ Հրդեհներ են բռնկվել նաև «վառելիքի և էներգետիկայի օբյեկտներում», հայտնել է նահանգապետը՝ առանց լրացուցիչ մանրամասներ հաղորդելու:

FIRMS-ի տվյալներով՝ հրդեհ է բռնկվել նաև Վոլգոգրադի մարզի Եֆիմովկա նավթամուղ կայանում, որը պատկանում է «Տրանսնեֆտ»-ին։

«Լուկօյլ» խմբի մաս կազմող «Կորոբկովսկիի գազամշակման գործարանը» մասնագիտանում է բնական և դրան կից նավթային գազի ինտեգրված վերամշակման մեջ և Հարավային դաշնային շրջանում ամենամեծ նմանատիպ ձեռնարկությունն է։

Հոկտեմբերի 9-ի առավոտյան ՌԴ Պաշտպանության նախարարությունը հայտարարել է, որ գիշերը ՌԴ տարածքում խոցվել է 19 անօդաչու թռչող սարք, սակայն գերատեսչության հայտարարության մեջ չի նշվել Վոլգոգրադի մարզում ոչնչացված անօդաչու թռչող սարքերի մասին։

Ուկրաինական անօդաչու թռչող սարքերը պարբերաբար հարվածում են Ռուսաստանի նավթավերամշակման գործարաններին և այլ վառելիքաէներգետիկ ձեռնարկություններին, որոնք հարձակումների պատճառով շատ հաճախ ստիպված են  դադարեցնել գործունեությունը: Անօդաչու թռչող սարքերի հարվածները Ռուսաստանում վառելիքի դեֆիցիտի պատճառներից մեկն են:

Թարգմանությունը՝ Էմմա Չոբանյանի