Հայաստանի և Ադրբեջանի վարչապետները Թբիլիսիում կմասնակցեն «Մետաքսի ճանապարհ» համաժողովին

Թբիլիսիում հոկտեմբերի 22-23-ը տեղի կունենա «Մետաքսի ճանապարհ» համաժողովը։ Կազմակերպիչների հաղորդմամբ՝ հինգերորդ ֆորումի գլխավոր թեման և կարգախոսն է «Ներդրումներ կատարեք կապի մեջ՝ աճեք կայունության մեջ» (Invest in Connectivity – Grow in Stability), գրում է Эхо Кавказа-ն:

Ֆորումը բացելու է Վրաստանի վարչապետ Իրակլի Կոբախիձեն։ Ըստ հաղորդագրության՝ միջոցառմանը մասնակցելու են նաև Հայաստանի և Ադրբեջանի վարչապետներ Նիկոլ Փաշինյանը և Ալի Ասադովը։

Ակնկալվում է շուրջ երկու հազար պատվիրակի մասնակցություն, այդ թվում՝ բարձրաստիճան քաղաքական գործիչներ, բիզնես ոլորտի և միջազգային կազմակերպությունների ներկայացուցիչներ, առաջատար համաշխարհային ընկերությունների ղեկավարներ, միջազգային ֆինանսական հաստատություններ և համաշխարհային մակարդակի փորձագետներ։

Ֆորումը կքննարկի համաշխարհային առևտուրը, տրանսպորտը և լոգիստիկան, Միջին միջանցքի զարգացումը, էներգետիկան, թվային փոխակերպումը և այլ թեմաներ։ Առանձին պանելային նիստ կնվիրվի Վրաստանի ներդրումային միջավայրին և հնարավորություններին։

Համաժողովի շրջանակում հոկտեմբերի 23-ին կկայանա Թբիլիսիի ֆինանսական գագաթնաժողովը, որի բացման արարողությանը ներկա կլինեն ֆինտեխ ոլորտի առաջատարները։

Թբիլիսիում «Մետաքսի ճանապարհ» ֆորումն առաջին անգամ կազմակերպվել է 2015 թվականին և անցկացվում է երկու տարին մեկ։ Նիկոլ Փաշինյանը և Ալի Ասադովը մասնակցել են նաև 2023 թվականին, երբ Վրաստանի այդ ժամանակվա  վարչապետ Իրակլի Ղարիբաշվիլին եռակողմ հանդիպում էր անցկացրել նրանց հետ։

Թարգմանությունը՝ Էմմա Չոբանյանի