10.10.2026 | 19:47
Քննարկվել են Հայաստանում կախվածությունների կանխարգելման և բուժման ուղղությամբ իրականացվող աշխատանքները
Yerevan.today-ից առգրավվել են այնպիսի նյութեր, որոնք կապ չունեն քննվող քրեական գործի հետ․ փաստաբան
Հասարակություն
25.10.2018 | 17:25
Վերաքննիչ քրեական դատարանում այսօր՝ հոկտեմբերի 25-ին, տեղի ունեցավ Yerevan.Today կայքի բողոքի դռնփակ քննությունը։
Նշենք, որ կայքը վիճարկում է խուզարկության թույլտվության օրինականությունը։
Փաստաբան Արմեն Ֆերոյանը լրագրողների հետ զրույցում նշեց, որ խմբագրության խուզարկության ընթացքում առգրավվել են լրագրողական գաղտնիք պարունակող նյութեր և իրավապահները տարել են այնպիսի տեղեկություն, ինչը որևէ առնչություն չունի հարուցված քրեական գործի հետ։
«Ընկերությունը տևական ժամանակ զրկված է լրատվական գործունեություն իրականացնելու հնարավորությունից։ Առ այսօր մեզ տեխնիկան չեն վերադարձրել, պատճառաբանում են, թե փորձաքննության եզրակացությունը դեռ չի ստացվել»,- ասաց փաստաբանը։
Վերջինս նշեց, որ խուզարկությունն արվել է մի շարք խախտումներով։
«Ոստիկանության աշխատակցի գրության հիման վրա խուզարկություն անելու պրակտիկան 2015թ.-ին վերացվել էր Հայաստանում։ Հարուցված քրեական գործը կարող է վերաբերել վերջին 6 ամիսներին, սակայն նրանք առգրավվել են մինչեւ 2006թ.-ի տեղեկությունները, ի՞նչ կապ ունի այդ ձայնագրությունը 2006թ.-ի հետ։ Այսինքն, խուզարկությունը կատարվել է օրենքի խախտմամբ, առգրավվել են այնպիսի նյութեր, որոնք ընդհանրապես կապ չունեն հարուցված քրեական գործի հետ, կայքի խմբագրությունում այն համոզման են, որ սա ճնշում էր լրատվական գործունեություն իրականացնող ընկերության վրա»,- ասաց Արմեն Ֆերոյանը՝ հույս հայտնելով, որ Վերաքննիչ դատարանը խուզարկության որոշումը կճանաչի ապօրինի։
Հիշեցնենք, որ ՀՀ ազգային անվտանգության ծառայության տնօրեն Արթուր Վանեցյանի և ՀՀ հատուկ քննչական ծառայության պետ Սասուն Խաչատրյանի միջև տեղի ունեցած հեռախոսազրույցի գաղտնիությունը խախտելու՝ այն ձայնագրելու և տարածելու դեպքի առթիվ հարուցված քրեական գործի շրջանակում վարույթն իրականացնող մարմինը, օրենքով սահմանված կարգով, միջնորդություններ է ներկայացրել դատարան 6 տարբեր հասցեներում, որոնցից մեկը եղել է «Yerevan.today» տեղեկատվական հարթակի խմբագրությունը, խուզարկություն կատարելու թույլտվություն ստանալու վերաբերյալ, որոնք բավարարվել են։
