17.02.2026 | 01:59
Կարինա Ակոպովան ու Նիկիտա Ռախմանինը 14-րդ տեղը գրավեցին ձմեռային Օլիմպիական խաղերում
ԱԹՍ-ներն առաջին անգամ գրոհել են Տյումենը, որն Ուկրաինայի սահմանից 2 հազար կիլոմետր հեռավորության վրա է
Քաղաքականություն
07.10.2025 | 13:00
ՌԴ Տյումենի Անտիպինո շրջանում գտնվող ձեռնարկության տարածքում հայտնաբերվել և վնասազերծվել է երեք անօդաչու թռչող սարք։ Տյումենի մարզային կառավարությունը այս մասին հայտնել է տելեգրամում, գրում է Meduza-ն։
Արտակարգ իրավիճակների ծառայություններն անօդաչուի մասին տեղեկություն են ստացել հոկտեմբերի 6-ի երեկոյան: Ըստ տարածաշրջանային կառավարության՝ պայթյուններ կամ հրդեհներ չեն եղել, տուժածներ չկան և մոտակա ձեռնարկությունները չեն դադարեցրել իրենց գործունեությունը:
Daily Storm-ը գրում է, որ սա Տյումենում անօդաչու թռչող սարքերի հարձակման մասին առաջին հաղորդումն է: Տարածաշրջանային իշխանությունները չեն մանրամասնել՝ արդյո՞ք անօդաչու սարքերն ուկրաինական են եղել։ Տյումենը գտնվում է Ուկրաինայի սահմանից ավելի քան երկու հազար կիլոմետր հեռավորության վրա:
Ուկրաինական OSINT Exilenova+ նախագիծը պնդում է, որ Տյումենի վրա անօդաչու թռչող սարքերի հարձակման հետևանքով վնասվել է ինչ-որ նավթավերամշակման գործարան: «Ռուսինվեստ» ընկերությանը պատկանող Տյումենի նավթավերամշակման գործարանը գտնվում է Անտիպինո թաղամասի մոտակայքում:
Ամռանից ի վեր Ուկրաինան պարբերաբար թիրախավորում է Ռուսաստանի տարբեր շրջաններում գտնվող նավթավերամշակման գործարանները: Այս ֆոնին Ռուսաստանում վառելիքային ճգնաժամ է զարգանում. օգոստոս և սեպտեմբեր ամիսներին բենզինի գները հասել են ռեկորդային մակարդակի, հարյուրավոր բենզալցակայաններ դադարել են աշխատել, իսկ որոշ շրջաններում սահմանափակվել է բենզինի վաճառքը կամ սահմանվել են գների շեմ: Դաշնային մակարդակով վառելիքի արտահանումը կասեցվել է առնվազն մինչև 2025 թվականի վերջը:
Թարգմանությունը՝ Էմմա Չոբանյանի
