Փաշինյանի բացատրությունը տրամաբանական չէ, Ալիևը պետք է հստակ բացատրի. Տիգրան Աբրահամյան․ ՏԵՍԱՆՅՈՒԹ

«Փաշինյանի բացատրությունը տրամաբանական չէ, երբ բացատրում է, թե ինչ նիատի ունի Ալիևը, երբ խոսում է, այսպես կոչված, «Զանգեզուրի միջանցք»-ի մասին, ավելին՝ Ալիևն այդ մասով պետք է բացատրություն տա, քանի որ այդ տերմինը կիրառողներն իրենք են։ Հայ հանրությունը պետք է դրա մասին իմանա, եթե կա այլ երթուղի, որի մասին մենք տեղյակ չենք, դրա մասին պետք է հայտարարեն»,- այս մասին խորհրդարանական ճեպազրույցների ժամանակ ասաց «Պատիվ ունեմ» խմբակցության քարտուղար Տիգրան Աբրահամյանը՝ անդրադառնալով հարցին, թե արդյոք համոզիչ էր Փաշինյանի պարզաբանումը Ալիևի՝ «Զանգեզուրի միջանցք» ձևակերպման առնչությամբ։

Տիգրան Աբրահամյանը ՄԱԿ- ամբիոնից Ալիևի ելույթը լսելուց հետո տպավորություն է ստացել, որ ՀՀ-ի և Ադրբեջանի միջև բանակցություններ չեն եղել, չեն եղել վաշինգտոնյան համաձայնությունները։

Հիշեցնենք, որ ՄԱԿ-ի աբիոնից Նիկոլ Փաշինյանն արձագանքել էր Ալիևի կիրառած «Զանգեզուրի միջանցք» տերմինին՝ հայտարարելով․ «Կոչով դիմում եմ ադրբեջանցի գործընկերոջս, որպեսզի պարզաբանի, քարտեզի վրա ցույց տա, թե ինչ նկատի ունի «Զանգեզուրի միջանցք» ասելով, որտե՞ղ է այդ «Զանգեզուրի միջանցքը», քարտեզի վրա պետք է ցույց տալ այդ «Զանգեզուրի միջանցքը»»։ Իսկ արդեն Երևանում՝ ԱԺ-Կառավարություն հարցուպատասխանի ժամանակ Փաշինյանն իր կարծիքն այսպես էր շարադրել․ «Երբ Ադրբեջանն ասում է՝ «Զանգեզուրի միջանցք», նկատի ունի Հորադիզ-Զանգելան ճանապարհը: Ուզում են ասեն «Զանգեզուրի միջանցք»՝ թող ասեն: Հայաստանի Հանրապետությունում չկա այդպիսի բան, և կարող եմ ապացուցել՝ ոչ միայն իմ, այլև Ադրբեջանի նախագահի ստորագրությունը կա: Կարող են ասել՝ դա միջանցք է, որ տանում է դեպի Զանգեզուր, ասում են, թող ասեն, Հայաստանի մասին չի դա»։

Մանրամասները՝ տեսանյութում։