Գազա օգնություն տանող նավատորմն Իսրայելին մեղադրում է «ահաբեկելու» մեջ՝ մինչ փորձում է մոտենալ պատերազմից տուժած գոտուն

Ակտիվիստները հայտնում են, որ Global Sumud միջազգային նավատորմը, որը մարդասիրական օգնություն է տեղափոխում, Գազա հասնելու համար ընդամենը 100 ծովային մղոնից մի փոքր է հեռու, գրում է Euronews-ը։

Նրանք բողոքել են, որ չորեքշաբթի առավոտյան մի քանի  նավեր մոտեցել են իրենց նավակներից մի քանիսին և մասնակցել «վտանգավոր և վախեցնող մանևրների»։ Նախագծի բրազիլացի մասնակից Տիագո Ավիլան նշել է, որ դրանք իսրայելական նավեր են եղել: Նա ասել է, որ դրանք վտանգավոր մանևրներ են կատարել և վնասել մի քանի նավերի կապի համակարգերը: Ավելի վաղ Global Sumud-ի մասնակիցները հայտնել էին, որ իրենց անհանգստացրել են անօդաչու թռչող սարքերը:

Խումբը վերահաստատել է իր մտադրությունը՝ շարունակել ճանապարհորդությունը դեպի պաղեստինյան անկլավի ափերը, չնայած Իսրայելի նախազգուշացմանը, որ նրանց թույլ չեն տա դա անել, քանի որ այն պատերազմական գոտի է: Նավատորմի ակտիվիստներն Իսրայելի կողմից Գազայի հատվածի շրջափակումը համարում են անօրինական։

Իսրայելն առաջարկել է մարդասիրական օգնությունը թողնել Աշկելոնի նավահանգստում՝ խոստանալով այն տեղափոխել կարիքավոր պաղեստինցիներին: Ավելի վաղ Իտալիայի իշխանություններն էին նմանատիպ առաջարկ արել։

Global Sumud նավատորմը բաղկացած է ավելի քան 40 քաղաքացիական նավակներից, որոնք տեղափոխում են շուրջ 500 մարդու։ Նրանց թվում են խորհրդարանականներ, իրավաբաններ և ակտիվիստներ, այդ թվում՝ շվեդ հայտնի կլիմայական ակտիվիստ Գրետա Թունբերգը։

Իսրայելն իր հերթին նրանց մեղադրում է սադրանքների մեջ. վերջին տեղեկությունների համաձայն՝ իսրայելական կողմն ունի փաստաթղթեր, որոնք հաստատում են ՀԱՄԱՍ խմբավորման ներգրավվածությունը նավատորմի նախագծում։

Թարգմանությունը՝ Էմմա Չոբանյանի