09.06.2026 | 00:17
Մարկո Ռուբիոն շնորհավորել է Փաշինյանին
ԵՄ-ն Ուկրաինային 4 միլիարդ եվրո է փոխանցել
Քաղաքականություն
01.10.2025 | 17:20
Եվրոպական հանձնաժողովը Ուկրաինային է փոխանցել մակրոֆինանսական օգնության իններորդ տրանշը՝ 4 միլիարդ եվրոյի չափով։ Պատերազմի սկզբից ի վեր ԵՄ-ի ընդհանուր աջակցությունն արդեն մոտենում է 178 միլիարդ եվրոյին։ Այս մասին հաղորդվում է ՌԲԿ Ուկրաինան՝ վկայակոչելով Եվրոպական հանձնաժողովի և Ուկրաինայի վարչապետ Յուլիա Սվիրիդենկոյի հայտարարությունները։
Նշվում է, որ այս փոխանցումն ավելի է ամրապնդում ԵՄ-ի դերը որպես Ռուսաստանի և Ուկրաինայի միջև պատերազմի սկզբից ի վեր ամենամեծ դոնորի, որի ընդհանուր աջակցությունը մոտենում է 178 միլիարդ եվրոյի։
Այս վճարման շնորհիվ, 2025 թվականի սկզբից ի վեր Ուկրաինային տրամադրված ընդհանուր աջակցությունը հասնում է 14 միլիարդ եվրոյի։
Այս աջակցությունը կօգնի Ուկրաինային բավարարել իր աճող ֆինանսական կարիքները, մասնավորապես, պաշտպանության ոլորտում։ Մասնավորապես, այսօրվա վճարումից 2 միլիարդ եվրոն կհատկացվի անօդաչու թռչող սարքերին, համաձայն ԵՄ-ի և Ուկրաինայի միջև կնքված փոխադարձ համաձայնագրի։
Ուկրաինայի վարչապետն իր հերթին հաստատել է, որ Կիևը ստացել է ԵՄ մակրոֆինանսական օգնության 4 միլիարդ եվրոյի տրանշ՝ ERA Loans մեխանիզմի շրջանակում։
«Խորհրդանշական է, որ վճարումը կատարվել է այսօր՝ Ուկրաինայի պաշտպանների օրը»,- նշել է նա՝ հավելելով, որ տրանշն ապահովվել է Եվրամիությունում Ռուսաստանի Կենտրոնական բանկի սառեցված ակտիվներից ստացված միջոցներով և կարևոր ազդանշան է Ուկրաինային՝ Եվրոպայի կողմից իր պաշտպանական կարողությունները ամրապնդելու և երկարաժամկետ աջակցություն ցուցաբերելու հանձնառության վերաբերյալ։
«Ես շնորհակալություն եմ հայտնում Եվրոպական հանձնաժողովի նախագահ Ուրսուլա ֆոն դեր Լեյենին և ԵՄ տնտեսական հարցերով և արտադրողականության հարցերով հանձնակատար Վալդիս Դոմբրովսկիսին իրենց առաջնորդության համար։ Այս միջոցները նշանակում են հազարավոր կյանքերի փրկություն, քաղաքների վերակառուցում և Ուկրաինայի անխուսափելի եվրոպական ուղին»,- նշել է Ուկրաինայի վարչապետը։
Հավելենք, որ Եվրոպական հանձնաժողովի նախագահ Ուրսուլա ֆոն դեր Լեյենն այս մասին հայտարարել էր նախօրեին Բրյուսելում Անվտանգության խորհրդի նիստի մեկնարկից առաջ։ Նրա խոսքով՝ Եվրահանձնաժողովը համաձայնության է եկել Ուկրաինայի հետ անօդաչու թռչող սարքերի արտադրության համար 2 միլիարդ եվրո հատկացնելու հարցում։ Ֆինանսավորումը պետք է օգնի ամրապնդել պաշտպանական կարողությունները և զարգացնել բարձր տեխնոլոգիաները։
Թարգմանությունը՝ Էմմա Չոբանյանի
