05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Թբիլիսիի դատարանը Սաակաշվիլիին և նրա պետանվտանգության նախկին ղեկավարին պարտավորեցրել է պետբյուջե վերադարձնել 3,3 միլիոն դոլար
Քաղաքականություն
29.09.2025 | 16:00
Թբիլիսիի քաղաքային դատարանը բավարարել է Վրաստանի ֆինանսների նախարարության հայցը և Վրաստանի երրորդ նախագահ Միխեիլ Սաակաշվիլիին և Պետական անվտանգության հատուկ ծառայության նախկին ղեկավար Թեյմուրազ Ջանաշիային պարտավորեցնել՝ բյուջե վերադարձնել մինչև 9 միլիոն լարի (մոտավորապես 3,3 միլիոն դոլար): Դատավոր Ալեքսանդր Գզիրիշվիլին որոշումը հրապարակել է սեպտեմբերի 29-ին, գրում է Эхо Кавказа-ն։
Սաակաշվիլին և Ջանաշիան դատապարտվել են, այսպես կոչված «բաճկոնների գործով»՝ բյուջետային միջոցների խոշոր չափերի հափշտակության համար, որը կատարվել է մի խումբ անձանց կողմից՝ համագործակցելով և չարաշահելով իրենց պաշտոնական դիրքը։
«Բոլորի համար պարզ է, որ դատական համակարգը ենթարկվում է Իվանիշվիլիի հրամաններին: Նրանք ասում են, որ Սաակաշվիլին պետք է փոխհատուցի, օրինակ, Դոնալդ Թրամփին Վրաստանում հյուրընկալելու կամ Վացլավ Հավելի գերեզմանին ծաղիկներ դնելու ծախսերը: Ի՞նչ է սա նշանակում: Մենք բազմիցս տեսել ենք ընտրողական, քաղաքական դրդապատճառներով և լիովին անհիմն որոշումներ Սաակաշվիլիի գործերով: Հիմա նրանք ֆինանսական հետապնդումներն են ավելացրել դրան, ուզում են նրան ներառել պարտապանների գրանցամատյանում: Որտեղ էլ մենք բողոքարկենք, նույն դատավորներն են մեզ սպասում»,- հայտարարել է Սաակաշվիլիի փաստաբան Բեքա Բասիլայան։
2025 թվականի մարտի 12-ին Թբիլիսիի քաղաքային դատարանը Միխեիլ Սաակաշվիլիին դատապարտել է 8 տարի ժամկետով ազատազրկման, Թեյմուրազ Ջանաշիային՝ տուգանել 300,000 լարիով։ Հետագայում ֆինանսների նախարարությունը քաղաքացիական հայց է ներկայացրել՝ մեղադրյալներից գումարը հետ ստանալու համար, որը, ըստ նախարարության, կազմում է 9 միլիոն լարի։
Սեպտեմբերի 29-ին Վերաքննիչ դատարանը կլսի նաև պաշտպանության կողմի բողոքը «բաճկոնի գործով» դատավճռի դեմ, ինչպես նաև մեղադրողի հակընդդեմ բողոքը։ Մեղադրող կողմը պահանջում է Թեյմուրազ Ջանաշիայի համար տուգանքը փոխարինել ազատազրկմամբ։
Նախկին դատավճիռների համաձայն՝ Միխեիլ Սաակաշվիլին բանտում կմնա մինչև 2034 թվականի ապրիլի 1-ը։ Նա և իր կուսակցությունը բոլոր դատավճիռները համարում են քաղաքականապես մոտիվացված։
Թարգմանությունը՝ Էմմա Չոբանյանի
