Իտալիայում զանգվածային գործադուլ և բողոքի ցույցեր են՝ ի պաշտպանություն Գազայի․ ՏԵՍԱՆՅՈՒԹ

Տասնյակ հազարավոր ցուցարարներ դուրս են եկել Իտալիայի տասնյակ քաղաքների փողոցներ, միաժամանակ, գործադուլները կանգնեցրել են գնացքների և ճանապարհային տրանսպորտի երթևեկությունը, այն բանից հետո, երբ արհմիությունները կոչ են արել համազգային գործադուլ անցկացնել՝ ի պաշտպանություն Գազայի հատվածի պաղեստինցիների, գրում է Politico-ն։

Իտալիայի վարչապետ Ջորջիա Մելոնիի կառավարությունը ճնշման տակ է Պաղեստինի պետականությունը ճանաչելու համար, այն բանից հետո, երբ Մեծ Բրիտանիան, Ավստրալիան, Կանադան և Պորտուգալիան արել են դա՝ Գազայի վրա Իսրայելի հարձակման միջազգային դատապարտումից հետո։

Բողոքի ակցիայի մասնակիցները նաև պահանջում են, որ Իտալիայի կառավարությունը կասեցնի Իսրայելի հետ առևտրային և ռազմական համագործակցության համաձայնագրերը և պաշտպանի 60 նավերից բաղկացած նավատորմը, որը հատում է Միջերկրական ծովը և մարդասիրական օգնություն է տեղափոխում Գազա։

Մելոնին ասել է, որ Հռոմը կճանաչի Պաղեստինի պետականությունը միայն այն դեպքում, երբ պայմանները դա գործնականում հնարավոր դարձնեն, իսկ նրա կառավարությունը ԵՄ-ում Իսրայելի ամենաուժեղ կողմնակիցներից մեկն է եղել։

Գործադուլը կազմակերպվել է այն բանից հետո, երբ Ջենովայի նավահանգստային աշխատողները խոստացել են աջակցել Global Sumud Flotilla նավատորմին, որի կազմում է նաև հայտնի ակտիվիստ Գրետա Թունբերգը՝ սպառնալով կանխել Իսրայել բեռներ տեղափոխող կոնտեյներային նավերի մեկնումը: Անցյալ շաբաթ Ռավեննայի նավահանգստային աշխատողները մերժել էին Իսրայել ուղարկվող զենք տեղափոխելու մեջ կասկածվող բեռնատարների մուտքը:

Իտալիայի 81 քաղաքներում բողոքի ցույցեր են անցկացվել՝ «Եկեք ամեն ինչ փակենք» կարգախոսով։ Գնացքների և ավտոբուսների երթևեկությունը չեղարկվել է, դպրոցներն ու համալսարանները՝ փակվել, քանի որ տեղական տրանսպորտի աշխատողները, ուսուցիչները և ուսանողները գործադուլ և դասադուլ են հայտարարել։

Ֆլորենցիայում ցուցարարները փակել են գլխավոր մայրուղու մուտքը։ Ջենովայում նավահանգստի աշխատողները խոչընդոտել են մուտքը, մինչդեռ ուսանողները փակել են Թուրինի, Հռոմի և Միլանի համալսարանների մուտքը։ Վենետիկում ցուցարարները երթով շարժվել են դեպի նավահանգիստ՝ ձեռքներին պաստառներ, որոնց վրա գրված էր «Գազան այրվում է, մենք ամեն ինչ կարգելափակենք» գրությամբ։

«Կարծում եմ՝ հիմա Պաղեստինը ճանաչելու պահը չէ, նույնիսկ եթե դա անհրաժեշտ և օգտակար է, բայց դա պետք է արվի այնպիսի գործընթացում, որի ընթացքում արաբական պետությունները նույնպես կճանաչեն Իսրայել պետությունը»,- ասել է Մելոնիի «Իտալիայի եղբայրներ» կուսակցության ավագ օրենսդիրներից Ջովաննի Դոնզելլին, երկուշաբթի օրը ITALPress լրատվական գործակալությանը։

Գազայի հատվածում պատերազմ է ընթանում գրեթե երկու տարի, այն բանից հետո, երբ 2023 թվականի հոկտեմբերին ՀԱՄԱՍ-ի գլխավորած զինյալների կողմից Իսրայելի վրա կատարված հարձակումը խլել է  մոտ 1200 մարդու կյանք, որոնց մեծ մասը քաղաքացիական անձինք էին։ Մոտ 250 մարդ, այդ թվում՝ երեխաներ, գերի են վերցվել ՀԱՄԱՍ-ի և այլ խմբավորումների կողմից և տարվել Գազա։ ՀԱՄԱՍ-ի կողմից ղեկավարվող Գազայի առողջապահության նախարարության տվյալներով՝  անկլավի վրա Իսրայելի կողմից ձեռնարկված պատասխան հարձակման հետևանքով զոհվել է ավելի քան 64,000 պաղեստինցի։ ՄԱԿ-ի գործակալությունները և անկախ փորձագետները նախարարության զոհերի մասին տվյալները համարում են ընդհանուր առմամբ հուսալի։

Թարգմանությունը՝ Էմմա Չոբանյանի