29.04.2026 | 13:47
Ոստիկանները մեքենաների հայելիների, ապակիների գողություններ են բացահայտել
ՌԴ ՊՆ-ն հայտնել է ավելի քան 200 ուկրաինական ԱԹՍ-ի խոցման մասին․ Պրիմորսկ նավահանգստում նավ է հրդեհվել
Քաղաքականություն
12.09.2025 | 11:44
Ռուս զինվորականները հայտարարել են, որ լույս սեպտեմբերի 12-ի գիշերը Ռուսաստանի տարածքում ոչնչացվել է 221 ուկրաինական անօդաչու թռչող սարք։ Մասնավորապես, Ռուսաստանի պաշտպանության նախարարությունը հայտարարության մեջ նշել է, որ Լենինգրադի մարզի տարածքում խոցվել է 28 անօդաչու թռչող սարք, գրում է Meduza-ն։
Անօդաչու թռչող սարքերի հարձակման պատճառով Սանկտ Պետերբուրգի Պուլկովո օդանավակայանը ժամանակավորապես դադարեցրել է չվերթների ընդունումն ու ուղարկումը: Ժամը 09:00-ի դրությամբ Պուլկովոյում չեղարկվել կամ ուշացել է ավելի քան 50 չվերթ, չեղարկվել ավելի քան 20-ը, որոնք պետք է վայրէջք կատարեին այս օդանավակայանում օրվա ընթացքում։
Լույս սեպտեմբերի 12-ի գիշերը նաև սահմանափակումներ են մտցվել Իվանովոյի, Պսկովի, Յարոսլավլի և Կալուգայի օդանավակայանների աշխատանքում։
Լենինգրադի մարզի Պրիմորսկ քաղաքում նավահանգստում գտնվող նավը հրդեհվել է ուկրաինական անօդաչու թռչող սարքերի հարձակման պատճառով։ Այս մասին հայտնել է մարզի ղեկավար Ալեքսանդր Դրոզդենկոն։ Նրա խոսքով՝ հրդեհը արագորեն մարվել է, «ջրհեղեղի կամ նավթի թափման սպառնալիք չկա»։ Դրոզդենկոն նաև հայտնել է Պրիմորսկի պոմպակայանում հրդեհի մասին։ Նա հավելել է, որ մարդիկ չեն տուժել։
Տոսնոյում խփված անօդաչու թռչող սարքերի բեկորներն ընկել են Պրոմիշլեննայա և Չեխովի փողոցների վրա, հայտնել է Լենինգրադի մարզի նահանգապետը։ Նրա խոսքով՝ տուժածներ չկան։ Ընդհանուր առմամբ, Դրոզդենկոյի խոսքով, Լենինգրադի մարզի տարածքում խփվել է ավելի քան 30 անօդաչու թռչող սարք։
Ռուսաստանի պաշտպանության նախարարության տվյալներով՝ Բրյանսկի մարզի վրա խոցվել է 85 անօդաչու թռչող սարք, Սմոլենսկի ՝ 42, Կալուգայի ՝ 18, Նովգորոդի ՝ 14, Օրյոլի և Մոսկվայի մարզի վրա՝ 9-ը, Բելգորոդի՝ 7, Ռոստովի և Տվերի՝ 3, իսկ Պսկովի, Տուլայի և Կուրսկի մարզերի վրա մեկական անօդաչու թռչող սարք։
Թարգմանությունը՝ Էմմա Չոբանյանի
