Քաղաքականություն
08.09.2025 | 21:43
Նեպալում կառավարության կողմից սոցիալական ցանցերի արգելքի դեմ ցույցերի ընթացքում ցուցարարների և անվտանգության ուժերի միջև բախումների հետևանքով զոհվել է առնվազն 19 մարդ, մի քանի տասնյակ վիրավոր կա, գրում է BBC-ն։
Հազարավոր մարդիկ են հավաքվել խորհրդարանի շենքի մոտ՝ բողոքելով Facebook-ը, X-ը և YouTube-ը արգելափակելու որոշման դեմ։
Նեպալի կապի նախարար Պրիտհվի Սուբբան BBC-ին ասել է, որ ոստիկանությունը ստիպված է եղել ուժ կիրառել, որը ներառում է ջրցան մեքենաներ, մահակներ և ռետինե փամփուշտներ։ Կառավարությունը հայտարարել է, որ սոցիալական ցանցերի հարթակները պետք է կարգավորվեն կեղծ լուրերի, ատելության խոսքի և առցանց խարդախության դեմ պայքարելու համար։
Բողոքի ակցիայի մասնակիցները պաստառներ են կրել, որոնց վրա գրված է՝ «Բավական է» և «Վերջ կոռուպցիային»։ Երբ հավաքը տեղափոխվել է խորհրդարանի մոտ գտնվող փակ տարածք, բողոքի ակցիայի մասնակիցներ փորձել են բարձրանալ պատի վրայով։
«Արցունքաբեր գազ և ջրցան մեքենաներ են օգտագործվել այն բանից հետո, երբ ցուցարարները ներխուժել են արգելված տարածք», – AFP լրատվական գործակալությանը ասել է Կատմանդուի հովտի ոստիկանության խոսնակ Շեքհար Խանալը։ Պարետային ժամ է սահմանվել։
Անցյալ շաբաթ իշխանությունները հրամայել էին արգելափակել 26 սոցիալական ցանցեր՝ Նեպալի կապի և տեղեկատվական տեխնոլոգիաների նախարարությունում գրանցվելու վերջնաժամկետը չպահպանելու համար։ Ուրբաթ օրվանից ի վեր օգտատերերը դժվարություններ են ունեցել հարթակներ մուտք գործելու հարցում, չնայած որոշները օգտագործում են VPN-ներ՝ արգելքը շրջանցելու համար։ Մինչ օրս երկու հարթակ վերագործարկվել է արգելքից հետո նախարարությունում գրանցվելուց հետո։
Նեպալի կառավարությունը պնդում է, որ չի արգելում սոցիալական ցանցերը, այլ դրանք փորձում է համապատասխանեցնել Նեպալի օրենսդրությանը։
Թարգմանությունը՝ Էմմա Չոբանյանի
