22.05.2026 | 18:10
Պետդումայի խոսնակը ՀՀ-ին մեղադրել է «ոչ բարեկամական» դիրքորոշման համար // «Ուժեղ Հայաստան»-ի համակիրներ են ձերբակալվել. ԼՈՒՐԵՐ
Վանի Աղթամար կղզու Սուրբ Խաչ եկեղեցում 13-րդ պատարագն է մատուցվել․ՏԵՍԱՆՅՈՒԹ
Մշակույթ
08.09.2025 | 23:30
Վանա լճի Աղթամար կղզու Սուրբ Խաչ հայկական եկեղեցում, որը Մշակույթի և զբոսաշրջության նախարարության հատուկ թույլտվությամբ տարին մեկ անգամ բացվում է ծեսերի համար, 13-րդ պատարագն է անցկացվել։
Անադոլու գործակալության հաղորդմամբ՝ պատարագին մասնակցելու համար քաղաք եկած հոգևորականներն ու այցելուները նավակով կղզի են տեղափոխվել։
Պոլսի հայոց պատրիարք Սահակ Մաշալյանը, նրա տեղակալ Հայր Կասպար Կարապետյանը և հոգևորականության հետ ժամանած եպիսկոպոս Հովակիմ Մանուկյանը կարճատև զրույց են ունեցել այցելուների հետ։
«Այստեղ ուխտավորները եկել են աշխարհի տարբեր ծայրերից՝ Ամերիկայից, Անգլիայից, Եվրոպայից, Անատոլիայի տարբեր մասերից, Ստամբուլից և, հատկապես, Հայաստանից: Մենք նշեցինք այս օրը: Մենք հիշատակեցինք մեր անցյալը 1100-ամյա Աղթամարի Սուրբ Խաչ եկեղեցում: Մենք շնորհակալություն հայտնեցինք այս օրվա համար: Հիմա մենք վերադառնում ենք տուն: Մենք մեր երախտագիտությունն ենք հայտնում պետական իշխանություններին, որոնք մեզ այս հնարավորությունը տվեցին: Թող մեր աղոթքները խաղաղություն բերեն երկնքից երկրի և մարդկության վրա: Մեր աղոթքն այն է, որ այս տարածաշրջանի ժողովուրդը, որը շատ է տառապել, սովորի անցյալից և հասնի այսօրվա խաղաղությանը, եղբայրությանը և միասնությանը»,-ասել է Մաշալյանը
Արարողությանը ներկա են եղել նաև մշակույթի և զբոսաշրջության նահանգային վարչության տնօրեն Աբդուրահման Շահինը, նահանգային ոստիկանապետ Մուրատ Մութլուն և Վանի թանգարանի տնօրեն Բյուլենթ Դեմիրը։
Հիշեցնենք, որ 2005 թվականին Թուրքիայի Մշակույթի և զբոսաշրջության նախարարությունը սկսել էր Վանի Աղթամար կղզու Սուրբ Խաչ եկեղեցու վերականգնման աշխատանքները։ 2007-ին էլ եկեղեցին այցելուների համար բացվել էր որպես թանգարան: 2010 թվականից ի վեր ամեն տարվա սեպտեմբերին՝ Խաչվերացի տոնին հաջորդող կիրակի օրը, Սուրբ Խաչ եկեղեցում պատարագ է մատուցվում:
Թարգմանությունը՝ Էմմա Չոբանյանի
