Ֆրանսիայի ծայրահեղ աջ կուսակցությունն արտահերթ ընտրությունների կոչ է անում՝ վարչապետի նկատմամբ հնարավոր անվստահություն հայտարարելու ֆոնին

Ֆրանսիայի ծայրահեղ աջակողմյան կուսակցության և վարչապետ Ֆրանսուա Բայրուի միջև տեղի ունեցած վերջին  բանակցությունները որևէ արդյունք չեն տվել: Այս մասին հայտարարել են կողմերի ներկայացուցիչները՝ նշելով, որ սա բարձրացնում է հավանականությունը, որ վարչապետը կպարտվի հաջորդ շաբաթ անվստահության հարցով քվեարկության ժամանակ, գրում է France 24-ը։

Երեք անգամ նախագահի թեկնածու առաջադրված Մարին Լը Պենը և նրա աջ ձեռքը՝ «Ազգային միավորում» (RN) կուսակցության առաջնորդ Ջորդան Բարդելան, կոչ են արել արտահերթ խորհրդարանական ընտրություններ անցկացնել հնարավորինս շուտ՝ սեպտեմբերի 8-ին խորհրդարանում կայանալիք քվեարկությունից հետո՝ բյուջեի շուրջ ամիսներ տևած փակուղուն վերջ դնելու համար։

«Ես և Ջորդանը կոչ ենք անում [խորհրդարանի] արագ լուծարման»,- ասել է Լը Պենը Բարդելայի հետ Բայրուի գրասենյակում մեկժամյա բանակցություններից հետո։

«Որքան շուտ վերադառնանք ընտրություններին, այնքան շուտ Ֆրանսիան կունենա բյուջե»,- հավելել է Բարդելան։

Ըստ նրա՝ հանդիպման ժամանակ «ոչ մի հրաշք» տեղի չի ունեցել, որը «կփոխեր «Ազգային միավորման» որոշումը»։

Վերլուծաբանները կանխատեսում են, որ Բայրուն և նրա կառավարությունը կփլուզվեն հաջորդ երկուշաբթի՝ պաշտոնավարման կես տարուց մի փոքր ավելի ժամանակ անց, և թե՛ ծայրահեղ աջ, թե՛ ձախ կուսակցությունները խոստանում են քվեարկել նրա փոքրամասնության կառավարության դեմ։

Դրանից հետո արդեն նախագահ Էմանուել Մակրոնը պետք է որոշի՝ վերանշանակե՞լ Բայրուին, ընտրել նոր վարչապե՞տ, որը կլինի նրա նախագահության յոթերորդ կառավարության ղեկավարը, թե՞ նշանակել արտահերթ խորհրդարանական ընտրություններ։ Նա կարող է նաև հրաժարական տալ, ինչպես պահանջում են ծայրահեղ ձախերը, բայց Մակրոնը բազմիցս բացառել է գործողությունների այս ընթացքը։

«Պատասխանը պարզ է. մենք չենք վստահում [Բայրուին]։ Վարչապետի համար իր ժամկետը երկարաձգելու միակ ճանապարհը մակրոնիզմի հետ կապերը խզելն է»,- հայտարարել է Լը Պենը։

Եվրոպական կենտրոնական բանկի ղեկավար Քրիստին Լագարդը հայտարարել է, որ Ֆրանսիայի կառավարության փլուզման ռիսկը «մտահոգիչ» է՝ նախազգուշացնելով, որ եվրոգոտու ցանկացած երկրում քաղաքական անկայունությունը կարող է ազդել շուկաների վրա։

«Եվրոգոտու ցանկացած երկրում կառավարության փլուզման բոլոր ռիսկերը մտահոգիչ են։ Քաղաքական զարգացումները և քաղաքական ռիսկերի ի հայտ գալն ակնհայտ ազդեցություն ունեն տնտեսության, այն բանի վրա, թե ինչպես են ֆինանսական շուկաները գնահատում երկրի ռիսկը, հետևաբար, մեզ համար մտահոգիչ են»,- ասել է նա։

Անցյալ հունիսին Մակրոնը հայտարարել էր արտահերթ խորհրդարանական ընտրությունների մասին, որը շատերը համարել էին ռիսկ, որն ավելի թուլացրեց նրան և հանգեցրեց խորհրդարանի ավելի մեծ մասնատվածության։

Հարցումները ցույց են տալիս, որ նոր ընտրությունները կհանգեցնեն նոր կախված խորհրդարանի, բայց «Ազգային միավորում»​​կուսակցությունը, հավանաբար, ավելի ուժեղ դուրս կգա։

Ցանկացած նոր վարչապետ կլինի հինգերորդը՝ Մակրոնի վերընտրվելուց երեք տարի անց։