Թուրքիան խզում է առևտրային կապերը Իսրայելի հետ և փակում իր օդային տարածքն իսրայելական ինքնաթիռների համար

Թուրքիայի կառավարությունը խզել է Իսրայելի հետ բոլոր առևտրային կապերը և փակել իր օդային տարածքը իսրայելական ինքնաթիռների համար։ Գազայի հարցով Թուրքիայի խորհրդարանական արտահերթ նիստում այս մասին հայտարարել է  երկրի արտգործնախարար Հաքան Ֆիդանը։ Միջոցառումները ներառում են նաև Իսրայելի նավահանգիստներ թուրքական նավերի մուտքի արգելք, գրում է Turkiye today-ը։

Ֆիդանը նշել է, որ Թուրքիան կտրականապես դեմ է ցանկացած առաջարկի, որը կարող է պաղեստինցիներին տեղահանել Գազայից՝ նման ծրագրերն անվանելով «անվավեր»։

Նա Իսրայելի գործողությունները բնութագրել է որպես «վերջին երկու տարիների ընթացքում Գազայում ցեղասպանության իրականացում՝ անտեսելով մարդասիրական հիմնարար արժեքներն աշխարհի աչքի առաջ»։

Թուրքիայի արտաքին գործերի նախարարը զգուշացրել է, որ Մերձավոր Արևելքում Իսրայելի ռազմական գործողությունները կարող են ամբողջ տարածաշրջանը ներքաշել հակամարտության մեջ, եթե դրանք չկանգնեցվեն։ Ֆիդանը դատապարտել է այն, ինչ նա բնութագրել է որպես Իսրայելի «անխոհեմ հարձակումներ Գազայի, Լիբանանի, Եմենի, Սիրիայի և Իրանի վրա»՝ դրանք որակելով որպես «միջազգային կարգին հակառակվող ահաբեկչական պետության մտածելակերպի ամենացայտուն նշան»։

Գազայում կատարված վայրագությունները «գրանցվել են որպես մարդկության պատմության ամենամութ գլուխներից մեկը», հավելել է նա։

Թուրքիայի խորհրդարանի խոսնակ Նուման Քուրթուլմուշն էլ կոչ է արել Իսրայելի դեմ «կոնկրետ քայլեր» ձեռնարկել, այդ թվում՝ կասեցնել նրա անդամակցությունը միջազգային կազմակերպություններին, ինչպիսին է ՄԱԿ-ը, մինչև այն չհրաժարվի «ցեղասպանական քաղաքականությունից»։

Ըստ աղբյուրի՝ 22 ամիս տևած անդադար հակամարտությունից հետո, գլոբալ սովի մոնիթորինգի՝ «Ինտեգրված սննդի անվտանգության փուլերի դասակարգում» կազմակերպության զեկույցում նշվում է, որ Գազայի հատվածում կես միլիոնից ավելի մարդ կանգնած է սովի, աղքատության և մահվան առջև, մինչդեռ ևս 1,07 միլիոն մարդ՝ բնակչության կեսից ավելին, բախվում է սուր սննդային անապահովության արտակարգ իրավիճակի։

Խոսելով Սիրիայի մասին՝ Ֆիդանը շեշտել է, որ Թուրքիան «թույլ չի տա, որ Սիրիայի հին և արժեքավոր համայնքները շահագործվեն» երկրի տարածքային ամբողջականության դեմ ուղղված աղավաղված նպատակների համար։

Թարգմանությունը՝ Էմմա Չոբանյանի