ՀՀ-ն չի դնում արցախահայերի վերադարձի հարց, բայց Ադրբեջանը դնում է ադրբեջանցիների վերադարձը․ պարտադրելու է իբրև օրակարգ․ Հրանտ Տեր-Աբրահամյան․ ՏԵՍԱՆՅՈՒԹ

«Մարտական եղբայրություն»-ն օգոստոսի 8-ին Վաշինգտոնում խաղաղության համաձայնագրի նախաստորագրումից 1-2 օր անց հայտարարեց․ «Վաշինգտոնում կնքված համաձայնությունները, որոնք ներկայացվում են իբրև ևս մեկ քայլ դեպի խաղաղություն, իրականության մեջ չեն բերելու՝ ա) տևական և կայուն խաղաղության, բ) Հայաստանի և Ադրբեջանի միջև առկա խնդիրների լուծման։ Ադրբեջանը պաշտոնական ամենաբարձր մակարդակով, հետևողականորեն և ինստիտուցիոնալ կերպով Հայաստանին ներկայացնում է հետևյալ պահանջները, այսպես կոչված «Արևմտյան Ադրբեջանի» նախագիծը, համաձայն որի՝ Հայաստանում պետք է բնակեցվեն այստեղ նախկինում ապրած ադրբեջանցիները, որոնք պետք է ստանան անվտանգության հատուկ` ոչ հայկական երաշխիքներ»։

Factor TV-ի հետ զրույցում պատմաբան, հրապարակախոս, «Մարտական եղբայրության» անդամ Հրանտ Տեր-Աբրահամյանն այսպես է հիմնավորում Ալիևի իշխանության՝ իրական խաղաղության պատրաստ չլինելու իրադրությունը․ «ՀՀ-ն չի դնում արցախահայերի վերադարձի հարց, բայց Ադրբեջանը դնում է ադրբեջանցիների վերադարձը։ Սա նշանակում է, որ պարտադրելու է իբրև օրակարգ։ Ալիևը Փաշինյանի կառավարության գլխին լծակ է պահում Բաքվի դատը, որ դուք ագրեսոր եք, պիտի պատժվեք։ Նա խաղաղության չի գնում։ Ալիևի ռեժիմի հենքը հայկական ագրեսիայի նարատիվն է, որ ինքը հաղթել է․ չի կարող գոյատևել, եթե սա հանվի։ Ռուսները доигрались, քանի որ իրենք մեջտեղ բերեցին Թուրքիային և Զանգեզուրի միջանցքի թեման, թուրքերը հասան միջանցքի՝ առանց ՌԴ-ի։ Եթե ռուսներից ուզում ենք կտրվել, Նոյեմբերի 9-ի թղթից ինչո՞ւ չենք հրաժարվում, ասելու են՝ մի րոպե՛, դո՛ւք եք ստորագրել։ Ինչո՞ւ պիտի ՀՀ-ով անցնի արտառոց ճանապարհ, կարևոր չի՝ ով է վերահսկողը, անխոչընդոտ ի՞նչ է նշանակում։ Ռուսասերներն ասում էին՝ միջանցքը պիտի ՌԴ-ին տանք․ հիմա ամերիկյան է, դարձավ վա՞տը, ո՞ւր էիք այսքան տարի»։

Հրանտ Տեր-Աբրահամյանը խոսել է նաև տարածաշրջանում ռուսական և ամերիկյան գործոնների առկայության և դրանց մրցակցության, Թուրքիայի ծրագրերի և դերակատարման, պատերազմի և խաղաղության հարցի, արտաքին քաղաքական այլ թեմաների մասին։

Հարցազրույցն ամբողջությամբ՝ տեսանյութում։

Ռոբերտ Անանյան