29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
«Դրուժբա»-ով նավթի մատակարարումը դադարեցվել է առնվազն հինգ օրով․ Հունգարիայի ԱԳ նախարար
Քաղաքականություն
22.08.2025 | 18:26
Հունգարիա և Սլովակիա նավթի մատակարարումը «Դրուժբա» խողովակաշարով ուկրաինական հարձակման պատճառով դադարեցվել է առնվազն հինգ օրով, X սոցցանցում գրառմամբ հայտնել է Հունգարիայի արտաքին գործերի նախարար Պետեր Սիյարտոն, փոխանցում է BBC-ի ռուսական ծառայությունը։
«Այս հարձակումներով Ուկրաինան առաջին հերթին վնասում է ոչ թե Ռուսաստանին, այլ Հունգարիային և Սլովակիային»,- նշել է նա։
Սիյարտոն նաև հրապարակել է Եվրահանձնաժողովին ուղղված դիմում՝ պահանջելով «երաշխավորել ԵՄ երկրների էներգամատակարարման անվտանգությունը»։ Դիմումը, Սիյարտոյից բացի, ստորագրել է նաև Սլովակիայի արտաքին գործերի նախարար Յուրայ Բլանարը։
«Հաշվի առնելով, որ վերջին տարիներին Եվրամիությունը և նրա անդամ պետություններն Ուկրաինային հարյուր միլիարդավոր եվրոյի աջակցություն են ցուցաբերել, մենք անընդունելի ենք համարում Ուկրաինայի գործողությունները, որոնք լրջորեն սպառնում են Հունգարիայի և Սլովակիայի էներգետիկ անվտանգությանը»,- ասվում է դիմումում։
Ուկրաինայի զինված ուժերն ավելի վաղ հայտնել էին «Դրուժբա» նավթատարի «Ունեչա» նավթավերամշակման կայանի վրա հարձակման մասին։ Բրյանսկի մարզի իշխանությունները, որտեղ գտնվում է կայանը, հայտարարել են, որ հարձակումից հետո բռնկված հրդեհն արդեն մարվել է։
