Երբ և ինչ պատճառով չեն գործել Երևանի մի քանի շատրվանները․ քաղաքապետարանի մեկնաբանությունը

Երևանը հայտնի է իր շատրվաններով, որոնք ոչ միայն գեղեցկացնում են քաղաքը, այլև շոգ օրերին ապահովում են զովություն թե՛ տեղացիների, թե՛ զբոսաշրջիկների համար։ Սակայն դրանք միշտ չէ, որ գործարկված են։ Օգոստոսի 19-ին Factor.am-ն արձանագրել է, որ Երևանի 2750-ամյակին նվիրված շատրվանը, ինչպես նաև Մյասնիկյան արձանի ետնամասում գտնվող շատրվանները ժամը 17:00-18:00-ն ընկած հատվածում անջատված են եղել։

Երևանի քաղաքապետարանից մեր հարցմանն ի պատասխան տեղեկացնում են, որ մայրաքաղաքի բոլոր շատրվանները շաբաթական մեկ անգամ լվացվում են և այդ օրերին դրանք չեն աշխատում։

«2750-ամյակին նվիրված շատրվանը այդ օրը չի աշխատել, քանի որ կատարվել են լվացման, ջրի դատարկման, նոր ջրի լցման և քլորացման աշխատանքներ։ Ամռան շոգ ժամերին, հատկապես կեսօրին բոլոր շատրվանները գործում են, եթե չեն գործում, նշանակում է գտնվում են լվացման փուլում կամ ունեն տեխնիկական խնդիրներ, որոնք վերացվում են հնարավորինս արագ»,- հայտնում են քաղաքապետարանից։

Երևան քաղաքի շատրվանները սպասարկվում են «Կանաչապատում և շրջակա միջավայրի պահպանություն ՀՈԱԿ-ի ջրային կառույցների սպասարկման վարչության կողմից։ Ըստ քաղաքապետարանի՝ որոշ շատրվաններ անջատվում են երեկոյան ժամը 20։00-ին, որոշներն էլ 23։00-ին։

Քաղաքապետարանից նշում են, որ մշտապես ձեռնարկվում են քայլեր, թարմացվում, վերանորոգվում և վերակառուցվում են շատրվանների պոմպերը։ Դրանց հիմնական մասը շատ հին են, սակայն ՀՈԱԿ-ը իրականացնում է շատրվանների վերանորոգման և փոխարինման, վերազինման աշխատանքներն՝ ըստ հրատապության։

Անի Թամրազյան