Կիևը դե յուրե չի ճանաչում ՌԴ-ի վերահսկողությունն օկուպացված տարածքների նկատմամբ, բայց կարող է դե ֆակտո համաձայնվել դրա հետ․ Պոդոլյակ

Կիևը կարող է որոշ ժամանակով ճանաչել Ռուսաստանի դե ֆակտո վերահսկողությունն օկուպացված ուկրաինական տարածքների նկատմամբ, բայց դե յուրե չի համաձայնվի դրա հետ։ Այս մասին իտալական La Repubblica-ին տված հարցազրույցում հայտարարել է Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը, փոխանցում է BBC-ի ռուսական ծառայությունը։

Նա ասել է, որ «այս պատերազմից դուրս գալու հիմնական տարբերակներից մեկը ռազմաճակատի գծի երկայնքով հակամարտությունը սառեցնելն է»։

Այս շաբաթ այդ մասին խոսել էր նաև Ուկրաինայի նախագահ Վլադիմիր Զելենսկին՝ այդպիսով մերժելով Դոնեցկի մարզի չօկուպացված հատվածները Մոսկվային փոխանցելու՝ Ռուսաստանի պահանջները։

Ուկրաինական իշխանությունները պնդում են, որ չեն կարող պաշտոնապես ճանաչել ուկրաինական տարածքների բռնակցումը, քանի որ դա հակասում է երկրի Սահմանադրությանը։

«Սա միայն սահմանադրական հարց չէ։ Սա միջազգային արգելքի խախտում է։ Չի կարելի միակողմանիորեն տարածք զիջել ագրեսորին։ Մենք պետք է այս հարցին մի փոքր այլ կերպ մոտենանք։ Ուկրաինայի նախնական դիրքորոշումն այսպիսին է. մենք հասկանում ենք, որ այս պատերազմից դուրս գալու հիմնական տարբերակներից մեկը ռազմաճակատի երկայնքով հակամարտության սառեցումն է: Սրանք տարածքներ են, որոնք ներկայում փաստացի օկուպացված են Ռուսաստանի կողմից: Դրանք այդպես էլ կմնան: Դրանից հետո զգալի ջանքեր կգործադրվեն՝ տնտեսական, դիվանագիտական ​​և այլ միջոցներով՝ այդ տարածքներն Ուկրաինային վերադարձնելու համար: Բայց դե յուրե դրանք կմնան ուկրաինական»,- ասել է Պոդոլյակը։